Hemserekê Pêroyî yê Partîya DEMî Tuncer Bakîrhan cewabê Bahçelî da û va ke, meseleya çekronayîşî û mixatabê Ocalanî karê înan nîyo.
Heyeta Partîya DEMî ya Îmralî, badê vengdayîşê Ocalanî yê çekronayîşî dest bi zîyaretkerdişê partîyanê sîyasîyan kerd.
Heyete ewro Parlamentoyê Tirkîya de bi partîya EMEPî reyde kom bî.
Hemserekê Pêroyî yê Partîya DEMî Tuncer Bakîrhan û Serekê Pêroyî yê EMEPî Seyît Aslan bade pêvînayîşî beyanatêko kilm da û cewab da persanê rojnamegeran.
Serekê MHP Devlet Bahçelî vatbi ke vengdayîşê Ocalanî YPG zî gêno xo mîyan.
"Karê ma nîyo"
Hemserekê Pêroyî yê Partîya DEMî Tuncer Bakîrhan cewab da nê vatişan:
"Mektuba Rêzdar Ocalanî şîbi Kandîl. Cewabê na mektube zî ameyo dayîş.
Çunke ma muxatabê muhtewaya mektube û cewabê ke ameyo dayîş nîyê. No karê ma nîyo. Nê demî de ganî ma bala xo bidê çareserkerdişê problemê Kurdan ke ekonomî û enerjîya Tirkîya apey bena û beno sebebê vîndîbîyayîşê cuya merdiman.
Ne ma mixatabê vengdayîşî yê û ne ma temsildarê HSDyî yê zî. Ma çîyo ke ma wendo û fehm kerdo vanê.
Ma çapemenî rê zî va. Vengdayîşê Ocalanî behsê demokrasî keno, behsê aştî keno. Vengdayîş dewleta Tirkîya rê vano ke êdî ganî Tirkîya probleman bi dîyalog û bi aiştî çareser bikero.
