53 baroyê Tirkiya û Bakurê Kurdistanî îlan kerd ke qet yew bingehê qeyûman yo qanûnî çin o.
Wezaretê Karê Zereyî yê Tirkiya vizêr bi yew beyanatê nuştekî da zanayîş ke înan qeyûm tayînê şaredarîyanê bajarê Mêrdîn û Êlih û qezaya Xelfetiyo kerdo.
Cayê Hemşaredarê Bajarê Girdî yê Mêrdînî Ahmet Turk de Walîyê Mêrdînî Tuncay Akkoyun, cayê Hemşaredara Êlihî Gulistan Sonuk de Walîyê Êlih Ekrem Canalp û cayê Şaredarê Xelfetî Mehmet Karayilan de zî Qaymeqamê Xelfetî Hakan Başoglu sey qeyûm tayîn bîyî.
53 baroyê Tirkiya û Bakurê Kurdistanî bi yew beyanatê muşterek tayînbîyayîşê qeyûman protesto kerd ke mîyanê înan de baroyê Îstambul, Enqere û Îzmîrî zî estê.
"Wa şaredarî peyser şêrê karê xo ser"
Her 53 baroyan Wezaretê Karê Zereyî yê Tirkiya ra waşt ke qerarê qeyûman bêro betalkerdene û şaredarê ke kar ra ameyê dûrvistiş wa peyser şêrê karê xo ser.
Beyanatê her 53 baroyan de wina vajîyayo: "Tayînkerdişê qeyûman vera qanûnî, heqê weçînayîş û weçînayîşî û îhtîyacê komelaya demokratîke yo û bi mudaxeleyê bêsinor resayo yew sewîyeyo giran.
Bingehê qanûnî yê tayînkerdişê qeyûman ke hetê Wezaretê Karê Zereyî ra beno çin o.
Ganî maddeya ke 2016 de Qanûnê Şaredarîyan de zêde bîya, bêro betalkerdene û mudaxeleyê manaya weçînayîş û weçînayîşî nêbo."