Batman de bi sebebo ke protestoyanê tayînkerdişê qeyuman de ca girewtê, 12 kesî tewqîf bîyê.
Wezaretê Karanê Zereyî yê Tirkîya 4ê Teşrîna Peyêne de qeyum tayînê Şaredarîya Bajaro Gird a Mêrdînî, Şaredarîya Batmanî û Şaredarîya Xelfetî ya Rihayî kerdbi.
Badê tayînkerdişê qeyuman, zaf şaristananê Kurdan de vera tayînkerdişê qeyuman protestoyî dest pêkerdbî. Mudirîyetê Emnîyetê Bajarî yê batmanî, seba tepiştişê kesanê ke protestoyan ca girewtê, dest bi xebate kerde.
16ê Teşrîna Peyêne de operasyonan de 24 kesî ameyî tepiştiş ke 6ê înan gede bî. Gore xeberanê Ajansa Mezopotamya (MA),kare îfadeyî yê kesanê ke tepişîyayî Merkezê Emnîyetê Batmanî de qedîya. Kesê ke tepişîyayî ra 12 kesî bi qerarê mehkema ameyî hepiskerdene.
12 kesî zî bi şertê kontrolê esdlî ameyî veradayîş. Kesê ke ameyî tewqîfkerdiş nameye înan wina yê: "Omer Altinişik, Huseyîn Turan, Diyar Alkanat, Muhammed Nurullah, Muhammed Avcil, Bariş Çal, Yakup Yunultaş, Yasîn Taşan, Yusuf Yavuz, Davut Yalvaç, Firat Çeken, Numan Baykal."
