Enwer Yılmaz
Vizêr û ewro Amed de varanêko xidar estbi û rîyê varanî ra şaristan de problemê pîlî amê meydan. Verê cû Metorolojî seba varayîşî hayîdarî daybî labelê tedbirî nêameyê girewtiş. Şaristan de zaf cayan de awe pêser bî, mehleyî binê awe de mendî trafik bi felc.
Varanê xidarî çend saetan ra pey Amed de rewşêka xirab vet orte. Zaf binvîyarî, rayîrî û mehleyî binê awe de mendî. Kanalê awî û rogarî nêeşkayî hende awe bikirişî û mehleyanê feqîran de problemî dest pêkerdî.
Yew het ra çatîyê bînayan fir dayî, binê çatîyan ra awe dekewte keyeyan, yew het ra zî wesayîtî rayîran de mendî.
Mîyanê Sûrî de cayanê tewr feqîran de, kanalîzasyonan ra awe û gemar vecîya.
Nê raştîyan ra fehm beno ke varanê xidarî mîyanê çend saetan de zaf zerar dayo şaristani.
Ekîbê Şaredarîya Sûrî cayê bîyayîşî de amade bîy û rogarê ke xetimyaybî akerdî. 272 hebî îxbarî resayî Mudirîya Pêroyî ya DÎSKÎ û şarî ardim waşt. Dima ekîba 100 kesî mîyanê şaristanî de dest bi karê akerdişê kanal û rogaran kerd.
Labelê, xeberê ke resayê ma û şahidan ra ke ma pêhesîyayê, vejîya orte ke verî ra dezgeyê dewlete tedbîrî nêgirewtî û şar mexdur bîyo. Seba modernkerdişê sîstemê binawanîye tedbîrî û projeyan ke verê cû vajîyayêne, nêameybî cakerdiş.
Netîce de, Amed de varanê xidarî rayna mojnayo ke dezgeyê dewlete hazir nîyê. Bêguman, gani vernîya nê probleman bigîrîyo. Problemo tewr gird, kanalê awî û ê kanalîzasyonî yê. Semede nînan ganî projeyî bêrê hadkerdiş.
Amed de vizêr yew hevalêk ez gêra va: "Çend serri yo ke ma nê problemî ancenê. Her varanê girdî ra pey, mehleya ma binê awe de manena, awe ser de şina û kanalîzasyonî keyeyanê ma kenê pîs.”
Zazakî News do nê mewzuyî teqîb bikero, çunke tesîrê nê problemî tesîrê x oma pêrûne ser o keno.
