ZAZAKÎ NEWS - Sekreterê Pêroyî yê Egitim Senî Zulkuf Guneş ard ziwan ke verê perwerdeyê ziwanê dayîke de astengiyê girdî estê. Guneşî eşkera kerd ke problem tenya problemêko akademîk nîyo esasê xo de problemêko komelkî û siyasî yo. Guneşî va: "Seba ke wa gedeyî bieşkê ziwanê xo yê dayîke de perwerde bigîrê bi serran o ke ma mucadele kenê."
Guneşî va ke ganî heme astengiyê ke verê zonê dayîke de estê wedarîyê û wina va: "Serra 2012 ra heta nika nameyê 'Zon û Zarawayê ke Ciwiyenê' de perwerdeyê 8-10 zonan sey dersê weçînitî yeno dayene. La no perwerde zî zaf giran aver şino. Hem malzemeyê ke lazim ê çin ê hem zî hûmara mamostan zaf kêm a. Winî zî seba ke mamostay dibistanan de rastê zordarîya pisîkolojîk û îdarî yenê, zafê înan branşê xo bedilnenê û vêrenê branşanê bînan."
Guneşî va ke emser do tenya 6 mamostayê dersê Kurdkî bêrê tayinkerdiş û qiseyê xo wina ramitî: "Wexto ke 15ê Gulane Roşanê Zonê Kurdkî nezdî beno de rewşa ma na ya. Wexto ke ma 13 serranê ke viyartê ra ewnîyenê, vînenê ke tenya 148 mamostayê Kurdkî amey tayinkerdiş. Hûmara zonanê bînan zî zaf kêmêr a. Na rewşe nêna qebulkerdiş."
Çime: Ajansa mezopotamya
