Serekîya Daîreya Park û Baxçeyan, seba ke Amed de şarî rê cayêna keskî û arisîyayîşî virazo, projeyan virazena û ramnena.
Do 216 hezar metrekare ser o bêro viraştene
Parka Bajarî ya Mezopotamya ke projeya vîzyonî ya ke do bajarî rê hewa bido, do Qezaya Kayapinarî de cayê ke Bulwarê Mezopotamya û DîcleKent yewbînan birnenê, cayêko 216 hezar metrekare ser o bêro viraştene.
Serekîya Daîreya Park û Baxçeyan, na projeya muhîme de ke parkanê klasîkan ra vejîyena teber, bi mottoyê “Cayê Têhetameyîşê Tebîet û Însanî” hereket kena û do cayê keskî bi hawayo ke ekolojî paweno biramno.
Parka neweye ya bajarî de do baxçeyê varanî ke awa varanî arê kenê û reyna danê xebitnayîş, virazîyê. Do pêroyê parke de dar û kerrayî bêrê şuxulnayene. Seba ke enerjî hîna zêde bibo do panelê enerjîyê rojî bêrê şuxulnayene, bi no hewa roşnîya parke û hewcedarîya elektrikî do bêrê temînkerdene.
Do bajarî rê sînema û kitabxaneyo akerdeyî bêro dayene
Proje de ke do cayê kayê gedeyan zî ca bigîrê, cayêko 2 hezar 165 metrekare de do sînemaya serakerda bêra viraştene.
Meydanê ke do parke de bêrê viraştene, do bi hawayêko ke her tewir festîval, konser û sey aktîvîteyî rehet bêrê organîzekerdene, bêrê dîzaynkerdene.
Proje de ke do kalîteya ciwîyayîşê bajarî ser o zaf tesîr bikero, cayê sosyalî do şarî rê mîyanê cayê keskî de îmkanê sporî, pîknîk û tenayîye bidê.
Serekîya Daîreya Park û Baxçeyan, do parke de kitabxaneyo akerde zî ca bigîro û plan kena ke 14 hezar 245 metrekare de beşê koleksîyonê nebatan, 4 hezar 800 metrekare de rayîrê bisîkletan, 2 tesîsê sosyalî, rayîrê gêrayîşî, cayê sporî û otoparkî zî virazo.
Do gedeyan rê cayê keyf û şayî bêrê viraştene
Şaredarîya Şaristanê Girdî do parke de ke 7 ra heta 70î seba her kesî yo, gedeyan rê di cayan de grûbê kayan ronayo. Grûbê kayan ke do konseptanê cîya-cîyayan de bêrê viraştene do bikerê ke gedeyî demê keyf û şayî de vîyarnê.
Do kitabxaneyê akerdeyî de aktîvîteyî bêrê viraştene
Kitabxaneyo akerde ke yew çîyo muhîm o parka ke yena plankerdene, wendişê kitaban ra teber do bibo cayê aktîvîteyanê cîya-cîyayan zî.
Do parke de çîyê awî zî ca bigîrê
Şaredarîya Şaristanê Girdî, do parka bajarî ya 216 hezar metrekare de çîyê awî yê cîya-cîyayan zî ca bigîro û do bikero ke cayê keskî hîna weş biasê. Çîyê awî do çeşme û hewzan ra bê.
Badê ke nêzdî de xebatê fîzîbîlîteyî qedîyayî, Serekîya Daîreya Park û Baxçeyan do seba viraştişê Parka Bajarî ya Mezopotamya şêro îhale û dima do cayê projeyî de dest bi karî bikero.
Çime: Bultenê Şaredarî Amedî