Tirkîya û Vakurê Kurdistanî de qeydê dersanê weçînitîyan ê kurmanckî û zazakî dewam keno. La problemo en pîl no yo ke mudirê wendegehan wendoxan û keyeyan mecbur kenê ke dersanê dînî weçînê û bi sebebanê cîya-cîyayan vera weçînayîşê dersanê kurdkî astengîyan vejenê.
Sendîka û Komelyanê Perwerdeyî vanê, gere no proses azad bo û wendekarî bi îradeya xo dersanê xo weçînê.
Tirkîya û Vakurê Kurdistanî de serra perwerdeyî ya 2025-2026î de wendegehanê mîyanênan de qeydê dersanê weçînayeyan dewam keno. Wendekarê sinifanê 5., 6., 7. û 8. eşkenê hetanî 17ê Sibate dersanê kurdkî (kurmanckî û zazakî/kirmanckî) weçînê.
Goreyê doneyê Wezaretê Perwerdeyî yê Tirkîya, serra 2024î de 31 hezar û 199 wendekaran dersê kurmanckî û 3 hezar û 805 wendekaran zî dersê zazakî weçînayo. Wendekarî eşkenê hetanî 17ê Sibate dersan weçînê û qeydê xo virazê. Endamê sendîka û komeleyî zî mudirê wendegehan ra wazenê ke prosesê weçînayîşê dersanê kurdkî de wendekaran û keyeyanê înan ser tehda nêkerê.
