ZAZAKÎ NEWS - Dewêka Dîyarbekirî de mangaya ke 5 aşmî verê cû axorî ra remaya dormeleyê dewe de gêrena û nêna dewe. Wayîrê manga ê wextî ra nata kene-nêkenê nêeşkenê manga tepişê.
Dewa Simakî ya qezaya Sûrî ya Amedî de par aşma Kanûne de yew manga axorê keyeyî ra vejîya teber û a roje ra nata peyser nêameya. Wayîrê manga û dewijan se kerd nêkerd, nêeşkay manga tepişê û peyser bîyarê.
‘Sey hargûşan remena’
Muxdarê dewe Alî Kaya vano ke: “ Na manga êdî bîya yebanî. 5-6 aşmî yo ke dorûverê dewe de gêrena, tenya bi sereye xo cuyena û nêna keye. Wexto ke ma vînena zî sey hargûşan remena. Wîna asîyeno ke ma bi tenya sereye xo nêeşkena na manga zeft bike. Ma îdarekaran ra ardim wazenê. Wa bêrê derzine pirode.”
Çimeyê xebere: Amida Haber