ZAZAKÎ NEWS - Şaxa Komeleya Heqanê Merdiman (ÎHD) ya Amedî derheqê prosesê aştîye de beyanat da. Hemserekê ÎHDyî Ercan Yilmazî va ke êdî dem demê xebate yo.
Partîya Karkeranê Kurdîstanî (PKK) 12ê Gulane de encamnameyê kongreya xo aşkere kerde. PKKyî va ke înan xo fesih kerdo. Nê qerarê PKKî welat, Tirkîye û zaf welatanê dinya de sey yew gama tarîxî amey vînayîş. Siyaset û dezgeyê sîvîlan wazenê wa êdî meseleya Kurd bi rayîrê aştîye bêra safîkerdiş. Şaxa Komeleya Heqanê Merdiman (ÎHD) ya Amedî derheqê prosese aştîye de awanîya xo ya Amedî de beyanatêk da. Serekê Şaxa ÎHDyî yê Amedî Ercan Yilmaz, endam û rayberê ÎHD û zaf kesî tewrê beyanatî bîyî.
Serekê Şaxa ÎHDyî yê Amedî Ercan Yilmazî beyanat da. Ercan Yilmazî va ke erdê ma ser o 40 serrî yo ke şer dewam keno û wina qisey kerd: “Ceng hem binpaykerdişanê heqanê merdiman zêde keno, hem zî seba neslanÊ neweyan travmayêka komelkî zêde keno. Kultur û cuya pîya apey visto. 3 aşmî verê cû Serekê PKKî Abdullah Ocalanî yew beyanat da. Veng da rêxistina xo ke xo fesih bikero, no zî hêvîya qedîyayîşê cengî kerd zêde. PKK zî cewab da vengdayîşî û xo fesih kerd.”
'No barê her kesî yo'
Ercan Yilmazî da zanayîş ke ganî heme beşê komelî bê şert û merc paştî bidê prosesî û wina dewam kerd: “No 40 serrî yo ke ceng dewam keno. Labelê çareserkerdişê ney tena milê şarê Kurdî ser o nîyo. No bar milê heme keso ke Tirkîye de ciwîyeno ser o yo. Şarê Kurdî verê awankerdişê Komare ra nat raştê înkar, kiştiş û koçberîya zorî ameyo. Ganî dewlete heme binpaykerdişanê heqan ê vera Şarê Kurdî qebul bikero. Nê çîyê ke Şarê Kurdî raştê ci ameyo, problema Kurdî vet werte.”
