Serekê PKKyî Abdullah Ocalanî 23ê Teşrîna Verêne ya 2024î de çarçewaya pêvînayîşê keyeyê xo de 43 aşman ra dima tewr verî bi birarzayê xo Parlamenterê DEM Partî yê Rihayî Omer Ocalan dir pêvînayîş kerd. Ocalanî pêvînayîşê xo de vatbî, "Eger şert û mercî bêrê ca, hêzê mi ya teorîk û pratîk esto ke ma na mesela rê hetê huqûqî û sîyasî ra çareyêk peyda bike."
Pêvînayîşî ra dima Buroya Huqûqî ya Asrinî îlan kerd ke 6ê Teşrîna Peyêne ya 2024î de 6 aşmî cezaya newe ya qedexekerdişê pêvînayîşî dîyaya Ocalanî.
Serekê Pêroyî yê MHPyî Devlet Bahçelî zî kombîyayîşê koma partîya xo yê 26ê Teşrîna Peyêne de va, "Ma pawenê ke mabênê Îmralî û koma DEMî de ri bi ri pêvînayîşî bêrê kerdene."
Hemserekê Pêroyî yê DEM Partî Tuncer Bakirhanî cewab dabi vengdayîşê Bahçelî û vatbi, "Ma sey DEM Partî wazenê şêrê Îmralî û semedê çareserîye Ocalanî reyde pêvînayîş bikerê."
DEM Partî seba ke Ocalanî reyde pêvînayîş bikero eynî roje Wezaretê Edaletî rê muracat kerd.
Wezaretê Edaletî aşmêk ra dima cewab da muracatê DEM Partî û heyeta DEM Partî ke mîyan de Pervîn Buldan û Sirrî Sureyya Onder estbî 28ê Kanûne de Girava Îmralî de Ocalanî reyde pêvînayîş kerd.
Dima ra Ahmet Turk zî beşdarê heyete bi. Waştişê Ocalanî ser Onder, Buldan û Ahmet Turk partîyanê sîyasîyan reyde dest bi pêvînayîşan kerd.
Heyete heta nika MHP, Partîya Gelecek, AKP û Partîya Saadetî reyde pêvînayîş kerd.
Heyeta Îmarlî bade zî Herêma Kurdistanî de Serekê YNKyî Bafil Talabanî, Kubat Talabanî û yê PDKyî Mesûd Barzanî, Nêçîrvan Barzanî û Mesrûr Barzanî dir pêvînayîş kerd.
Heyetê Îmralî yê DEM Partî dima ke Girava Îmralî de Serekê PKKyî Abdullah Ocalanî reyde pêvînayîş kerd, agêra Îstanbul.
Heyetê Îmralî yê DEM Partî ke Ahmet Turk, Pervîn Buldan, Sirrî Sureyya Onder, Tulay Hatîmogullarî, Tuncer Bakirhan, Cengîz Çîçek û Faîk Ozgur Erolî ra yenopê, seba pêvînayîşê bi Abdullah Ocalanî reyde şi Girava Îmralî.
Bajaranê Amed, Wan ê û bajarê Sileymanîye yê Herêma Kurdistanî û bajaranê Kobanî, Qamişlo, Reqa, Hisîça yê Rojavayê Kurdistanî de bi sedan kesî meydananê bajaran de kom bîyê û mesaja Abdullah Ocalanî pawitê.
Ahmet Turkî vengdayîşê Abdullah Ocalanî bi Kurmanckî, Sirri Sureyya Onder zî bi Tirkî wend.
Mesaja Serekê PKKyî Abdullah Ocalanî wina ya:
PKK; seserra 20. de, seserra tewro huşk o tarîxî de awan bî. Zemîno ke PKK têdeyî de ame awankerdene zemînê di şerê dinya, reel-sosyalîzm û demê şerê serdî yê dinya de bî. No zemîn de înkarkerdişê raştîya kurdan, qedexekerdişê azadîyan, bi xususî zî qedexekerdişê azadîya ramanî werte de bî.
Warê teorî, bername, stratejî û taktîkan de bandorê raştîya pergalê reel-sosyalîstî yê seserre de ser no awanbîyayişî virazîyayo. Serrê 90î de, seba semedê mîyanxoyî rijyayişê reel-sosyalîzmî, şikyayîşê înkarê nasnameyî welat de û averşîyayîşê azadîya ramanî bî semed ke PKK manayê xo zaf dibare bikero. No ser zî ameyo peynîya xo û lazimo bi fesîhkerdişê ci est o.
Têkilîya kurd û tirkan, tarîxê zafêrî de hezar serran de tirkan û kurdan seba bîyayîşê xo didomnê û verba hêzê hegemonîkî de ser pîyan bimano, her tim lazimo pê dîyîşo ke bi zerrîdarî mîyanê tifaqakî de bimanê.
Seserra peynî ya modernetîya kapîtalîstî de, şikyayîşê nê tifaqî de xo ra kerdo armanc. Hêzê ke bandor înan bîyo, bingeyê xo yê çînî, xizmetê na yewe esas girewtê. Na pêvajo bi şîroveyê yewrengî yê Komara lezgine bîyo. Erka sereke no yo ke têkilîya tarîxî ya ewro şikyaya, bi rûhê birayîya û yewîya, heme ma bawerîyan zî peygoş nêkenê, do newe ra birêxistin bikerê.
Lazimîya komelê demokratîke jêneger a. PKK, tarîxê Komare de têgêrayîşê serehawanayîş û şîdetî ya tewro derg û hera yo. No ser rayîrê sîyasetê demokratîke girewte bî, PKK bi hêz bî û destek girewt.
Netew-dewletê cîya, federasyon, xoserîya îdarî û çareserîyê kulturalîst ke netîceyê lazimeya netewperestîya tund ê, nêeşkenê sosyolojîya komelo tarîxî ra bibê cewab.
Rêzgirewtişê nasnameyan, azadîya ramanî, rêxistinbîyayîşê demokratîke, awankerdişê komelî-aborî û sîyasî heme pêrabesteyan, tena bi bîyayîşê komel û warê sîyasî ya demokratîke mumkun o.
Seserra diyine a Komare tena demo ke bi demokrasîya bêro tacîdarkerdişî eşkeno bibo wayîrê yewîye û verdewamîyêko mayînde, demokrasîya pê ti rayîrêko gêrayîşê pergalan û pêkanîna înan çin o û nê mumkun o. Pêameyîşê demokratîk rêbazê bingeyîn o.
Wa ziwanê semedê aştî û komelê demokratîke zî goreyê ci raştîye bêro averberdiş.
Vengo ke Birêz Devlet Bahçelî kerd, îradeya ke Birêz Serekkomar nîşan û nêzdîbîyayîşê erênî yê partîyê bîn na pêvajo kerd û ez zî na pêvajo de vengê çekronayîşê kena û ez berpirsîyarîya tarîxî ya no vengê gêno ser xo.
Senî ke her komel û partîya hemdemke estbîyayîşê ci bi darî zorê nêameyo bipeynîkerdiş, şima zî bi zerrî kongreya xo bikom bikerê û biryaran bigêrê; wa heme kom çekê xo ronê û PKK xo fesîf bikero. Ez silamê xo heme kesan ra erşewana ke bawerîya cuyeya hembar kena û goş bidê vengdayîşê mi.
25ê Sibata 2025î Abdullah Ocalan”
‘Wa hetê huquqî bêro naskerdene’
Sirri Sureyya Onder peynîya beyanatî qise kerd û va ke Abdullah Ocalan heyetî ra wina vato: “Bêguman seba pratîk de çek bêro ronayîş û PKK xo fesîh bikero, wa hetê sîyaseto demokratîk û huquqî bêro naskerdene.”