Hemşaredara Şaredarîya Amedî ya Şaristanê Girdî Serra Bucak "Têhetameyîşê Ciwanan" de ciwanan reyde ameye têhet û derheqê rewşa fîzîkî ya şaristanî, problemê îstîhdamê ciwanan û fealîyetê ke warê kultur û hunerî de bîyê, persanê înan rê cewab da.
Hemşaredara Şaredarîya Şaristanê Girdî Serra Bucak, Merkezê Kultur û Kongre yê Çand Amedî de "Têhetameyîşê Ciwanan" ke organîze bîyo, tede ciwanan reyde ameye têhet. Têhetameyîşê ke Îbrahîm Şikî moderatorîye kerde, Hemşaredare Bucak persanê ciwanan rê cewab da û eleqeyêko gird reyde pêşwazî bîye. Têhetameyîşî de zaf ciwan û serekê daîreyan û endamê meclîsî zî beşdar bîyî.
Têhetameyîşî de ke ciwanan şans dî ke derheqê rayberîya herêmkî de pers bikerê û fikrê xo pare bikerê, Hemşaredare Bucak, waştişê ciwanan goşdarî kerdî û persanê înan rê cewab da.
Hemşaredare Bucak va: "Seba mi şexsen rojêka zaf heyecanin a. Hemşaredar Dogan teberê şaristanî de yo, zaf selamê ey şima rê est ê. Helbet ge-ge destê ma de nêbeno ê programî virazîyenê. Ma do fikr, pêşnîyaz û rexneyê şima pêroyînan bigîrê. Salona de şima ra tever serekê daîreyan, xebatkarê beşanê eleqedaran û endamê meclîsî est ê, ê zî do pêşnîyazanê şima not bigîrê."
Bucak wina dewam kerd "Ma pê piştîdayîşêko zaf muhîm ê şarê Dîyarbekirî ameyê weçînayene, tîya de ciwan zî est ê ke reya xo daybî. Ma do ciwanê mektebî, unîversîteyî, heme kesê ke xo nê şaristanî mîyan de hîs kenê û wazenê beşdarê şaristanî bibê, goşdarîya pêşnîyaz û waştişanê înan bikerê."
Hemşaredare Bucak ke va têhetameyîşî de ameyo waştene ke prensîbê beşdarîye ser o dewam bikerê, wina dewam kerd "Sey şaredarîya ma û şaredarîyanê qezayan, Meclîsê Şaristanî ra heta mekanîzmayanê şaredarîye, ma tîya de yê ke embazê ciwan, kesê ke wazenê karê cîya-cîyayan bikerê, vengê xo vejenê û mekanîzmayanê beşdarîye virazenê, pêşnîyazanê înan goşdarî bikerê. Rind o ke şima ameyî, rind o ke şima tîya de yê."
Hemşaredare Bucak, badê qalîkerdişî, persanê ciwanan rê cewab da. Derheqê şuxulnayîşê çekan ê şexsî ke zêde bîyê, xebatanê ke derheqê şuxulnayîşê madeyan de, rewşa merkezanê ciwanan de persî ameyî persanayene. Bucak wina cewab da "Ma merkezanê xo yê ciwanan hem hetê rewşa înan ra hem zî hetê fealîyetanê înan ra ganî newe ra virazê. Ma heme cayan ra warê ciwanan ra heta warê cinîyan, yew awankerdişî û 'ma se kenê' de xebitîyayê."
Bucak persê derheqê xebatanê warê kultur û hunerî de wina cewab da: "Ganî ma cîgêrayîşanê neweyan bikerê, ganî ma kulturanê bînan cigêrayîş bikerê. Ma zafêr xebatanê mîyanneteweyî û hemkarîye kenê. Festîvalê Fîlmanê Amedî zî nê war de rojanê ameyoxan de do lansmanê xo zî bibo. Hewce yo ke hewcedarîya ma warê neweyê hunerî rê est o. Ma do bê vindertene hunerî ciwanan reyde, cinîyan reyde bîyarê têhet û xebatanê xo dewam bikerê."
Çime: Bultenê Şaredarî Amedî
