Komîteya Pawitişê Rojnamevanan (CPJ) îfade kerd ke, rojnamevanê ke seba medyayanê Kurdan xebitîyenê, sere de Tirkîya, çend welatan de ribiriyê rîskan manenê.
CPJ dano zanayene ke goreyê melumatanê Kanûna 2024î, welatanê cîya-cîyayan de 10 rojnamevanê kurdan seba xebatanê xo hepis de yê.
Na sazîya mîyanneteweyî, 3 rojnamevanê Ajansa Xeberan a Mezopotamya û JINNEWSî reyde roportaj kerdo ke nê her hîrê zî bi endamtîya Partîya Karkeranê Kurdistanî (PKK) ya bêqanûnî yenê sûcdarkerdiş.
Roportaj de, Ajansa Xeberan a Mezopotamya ra Delal Akyuz îfade kerd ke Tirkîya de rojnamevanî zaf ribiriyê tepiştişan manenê. Akyuz da zanayene ke a verê zî di-hîrê rey ameya tepiştiş, la a bawer nêkena ke aye çîyêko şaş kerdo.
JINNEWSî ra Melîke Aydin roportaj de va ke delîlanê ke tam delîl nîyê reyde ê yenê sûcdarkerdiş. Aydin îfade kerd ke aye embazêkê xo rê 500 lîra (nêzdîyê 14 dolarî) erşawitê û mehkeme de aye ra ameyo persayîş ke gelo a endamê rêxistina terorê ya yan nê. Aye va ke, kenê ke têkilîye min ê telefonî terorîze bikerê.
Ajansa Xeberan a Mezopotamya ra Tolga Güney zî roportaj de va ke o seba xeberanê xo yê ser dormeleyî bîyo hedefê hikûmetî. Güney îfade kerd ke cipersayîş de ey ra ameyo persayene ke o bi fermanê kamî xebitîyeno, la o karê xo yê rojnamevanîyî keno û nê bîyayîşan nuseno ke înan bi çimanê xo vîneno.
Çime: CPJ-VOA
