DEM Partî verê Tirbeya Ehmedê Xanî ya Bazîdî de Stratejîya Ziwan û Kulturê Kurdan eşkera kerde. Namzedanê DEM Partî va,ê do her wext her ca de ziwan û kulturê kurdan bîyarê ca.

Komîsyonê Ziwan û Kulturî yê Partîya Demokrasîyî û Têtûştîye ya Şaran (DEM Partî) qezaya Bazîdî ya Agirî de, verê Tirbeya Ehmedê Xanî de  kombîyayîşêk kerd û Stratejîya Ziwanê Kurdkî û Kulturê Kurdan a Şaredarîyan eşkera kerde. Namzedê şaredarî yê partîye bi kincanê xo galerîyan tewrê kombîyayîşî bîyî.

Namzedan verî Tibeya Ehmedê Xanî zîyaret kerd. Dima Vervatoxê Komîsyonê Ziwan û Kulturî ya DEM Partî Heval Dilbahar derheqê muhîmîya ziwan  û kulturê kurdan de  eşkerayîye daye. 

Deklerasyon hetê Namzeda Şaraderîya Bajarê Pîlî yê Wanî Neslîhane Şedal ra ame eşkerakerdene. 

Deklarasyonê DEM Partî yo ke bi kirdkî-kirmackî zî ame vilakerdene wina yo:

Stratejî û Polîtîkaya Ziwanê Kurdkî û Kulturê Kurdewarî ya Şaredarîyan 

Ziwanê Kurdkî û kulturê kurdewarî di stûnê bingeyîn, xoser û muhîm ê neteweya kurdî yê, ke hetê kurdan ra sey bîyayîş, xobîyayîş û rûmet û nasnameyanê neteweyîye yenê pênaskerdene. Ziwanê kurdkî û kulturê kurdewarî seba zaf sebeban ver nika zî mabenê dormaregirewtiş, çinhesibnayîş, qedexekerdiş, helênayîş û orte ra hawanayîş de yo. Her tewir teda û hêrişî serê ci de yenê viraştene. Şarê kurdî zî bi serran o seba ziwan û kulturê xo têkoşînêkê biheybetî ray beno. Warêkê nê têkoşînî, warê xorayberdişê herêmî yê.

Kurdistan de, erk û wezîfeyêkê bingeyînî yê xorayberdişê herêmî, averberdişê kar û xebatanê pawitiş û averberdişê ziwanê kurdkî û kulturê kurdewarî yo, Ganî ma dîyar bikerê ke semedê serkewtîşê xebatanê ziwanê kurdkî û kulturê kurdewarî, senî ke lazim o her warê cuya komelî de xebatanê zafhetî bêrê rayberdene, seba rayberdişê nê xebatan zî teqez sere ra  heta binî ma heme hemşaredar, endamanê meclîsî, rayber, xebatkaranê şaredarîyanê ma zî mîyanê kar û xebatanê kurdkî û kurdewarî de bibê.

Ma sey namzedanê hemşaredarîyanê Partîya DEMî û heme endamanê meclîsî yê ma, çarçewaya rayberdişê herêmî yê zafziwan û zafkulturî de, bi xususî seba rastîya rewşa ziwanê kurdkî, kulturê kurdewarî, do heme kar û xebatanê xo de ziwanê kurdkî û kulturê kurdewarî û daraxê tewr corî de esas bigîrê, seba pawitiş û averberdişê înan her milî ra, her dem û he ca de bi hewayêkê şênber, domdar, mende, xelqker û netîcegirewte her kar û xebatanê muhîmî bikerê. Senî ke Ehmedê Xanîyo nemerg vano: “No zeman de her kes mîmarê dêsê xo yo.”; ma zî do bibê mîmarê ziwanê kurdkî û kulturê kurdewarî. 

Bi goreyê nê:

-Her çiyî ra ver ma do babeta ziwanê kurdkî û kulturê kurdewarî stratejî, polîtîka, program, plazsazî û karnameyanê xo yê seba her warî de amade û dîyar bikerê; seba pêardişê nê daraxê tewr corî de butçe, kadro û xabetkaran biaqitnê; bi no qayde bi rayapêroyî rê pare bikerê û seba pêardişê înan çi lazim o ma bikerê.

-Verba karê helênayîşê ziwanê kurdkî û kulturê kurdewarî de, ma do her dem, her war û her milî de, goreyê proje, program, karname, û plazsazîyanê xo yê demkilm û demmîyan û demderg de çalakî û xebatanê cîya bi cîya yê ziwanê kurdkî û kulturê kurdewarî pêbîyarê.

-Seba ke ziwanê kurdkî bibo wayîrê statu, bibo ziwano fermî û ziwanê perwerdeyî ma do hetê heme sazî, dezgehanê têkildarî de mîyanê têkoşîn û xebatanê muhîmî yê domdar de bibê.

-Seba rayberdişê heme kar û xebatanê kurdkî, bi kurdkî û kurdewarî, ma do heme şaredarîyanê ma de Mudirîyetanê Pawitiş û Averberdişê Ziwan û Kulturî awan bikerê.

-Hemşaredaran ra bigîrê heta endamanê meclîsî, rayber, kadro, karmend, şêwirmend û heme xebatkaranê şaredarîyan seba ke hişmendîya kurdkî bizanê do bêrê perwerdekerdene; sey şertêkê bingeyînî teqez do daraxêkê berzî de perwerdeyê kurdkî bivînê, qiseykerdiş, wendiş û nuştişî daraxê tewr başî de bimusê û bizanê.

-Materyalanê resnayîşî yê şaredarî yê sey resnayîş, vengdayîş, malperanê webî, rîpelanê medyaya dîjîtalî, tabela, pano, afîş, eşkera, vengdayîş, kar û xebatanê rojane û seypê yê fermî, pêroyî, komelî do daraxê tewr corî de bi ziwanê kurdkî zî bibê.

-Ma do binê banê şaredarî de bulten, kitab, kovare, çimeyanê, berhemanê bînî yê kurdkî biweşînê.

-Xizmetanê weşîye ra heta kar û barê perwerdeyî, xizmetanê komelî ra heta xizmetanê kulturî, xizmetanê pêroyî ra  heta xizmetanê seba doman, cinî û heme dormareyê bînî yê komelî, heme xizmetanê şaredarî de do daraxê tewr corî de bi kurdkî bibê. 

-Ma do namekerdiş û nasnayîşê heme ca û yewîyanê şaredarîye, heme silgir û kelmelanê bîn sîwana şaredarî de eynî demî de bikerê kurdkî zî.

-Ma do nameyanê dewe, taxe, şaristanek, qeza, şaristan û heme ca, war, cugeh, wargeh, ganî, obje û kelmelanê bi kurdkî yê ke ameyê bedilnayene reyna bikerê kurdkî û wina bikar bîyarê.

-Ma do waranê komelî yê banderkerî û perwerdeyê ziwanê kurdkî û kulturê kurdewarî yê sey kreş, verdibistan, wendegeh, keyeyanê perwerdeyîye û musnegeh, keyeyanê deyîrbazan, keyeyanê sanikvatoxan, keyeyanê kaybazan, kitabxane, wendişgeh, edebîyatgeh, kulturgeh, hunergeh ûsn. yê kurdkî awan bikerê; nê cayan ser de doman, ciwan, cinî bi hezaran kesan perwerde bikerê.

-Ma do zaf cayan sazî, dezgeh û akademîsyanê tarîx, ziwan, edebîyat, kultur û hunerî yê kurdkî û kurdewarî yê pêroyînî de û yê doman, cinî û ciwananan awan bikerê. Eynî demî de nê cayan de xebatanê cigêrayoxî, arêkerî, tomarkarî, banderkarî, perwerdekarî, nuştoxî, ziwanzanî, edebîyatkarî, kultur, hunermendîya kurdkî û kurdewarî ray berê; rayberî û hetkarîya amadekerdişî û pêardişê projeyanê derheqê înan de bikerê.

-Ma do her şaristan, qeza, şaristanek, taxe, dewe û cugehanê Kurdistanî de seba serwerkerdişê xebatanê hewceyan ray berê, her tewir bername û çalakîyanê cîya bi cîya tertîb bikerê.

-Ma do konseyanê şaristanî yê ke do ser bingeyê temsîlîyetê seypê û demokratîkî yê kom û komelanê wayîr ziwan û kulturê cîya bêrê awankerdene de ziwanê kurdkî daraxê tewr corî de bikar bîyarê û bidê şuxulnayene û bikerê ziwanêko bingeyî.

Ma do seba pawitiş û averberdişê ziwanê kurdkî, kulturê kurdewarî û heme erjanê neteweya kurdî, heme sazî, dezgeh, platform, însîyatîf, sendîka, oda, weşanxane, karsaz, esnaf, konseyê şaristanî, dormareyanê bîn ê şaristan, qeza, û şaristanekan de xebatanê hemparî yê şênber ray berê; seba ke her keye, xan, papûre, taxêkê şaristanî, û cugehanê ma yê bîn de ziwanê kurdkî û kulturê kurdewarî serwer bibo çi lazim bibo ma do bikerê.

Ma sey rayberdişî yê herêmî yê şarê xo, seba averberdişê xebatanê cor û zafêr xebatanê bîn ê pawitiş û averberdişê kurdkî, kultur, edebîyat, hunerê kurdkî û kurdewarî de teqez qerardar ê, seba pêardişê înan çi lazim bibo ma do bikerê; no sozêkê ma yo bingeyî yo seba şarê ma. Bêşik, ma do no zî bi şarê xo rê bikerê û pîya bi ser bikewê.

Bi nê minasebetî zî; ma veng û vajî heme şarê xo kenê ke têkoşînê xo yê seba ziwan kurdkî, kultur û heme erjanê kurdewarî bi serkewtişê weçînayîşanê herêmî tacîdar bikerê.

Dem demê ziwanê kurdkî û kulturê kurdewarî yo!

Her dem ziwanê kurdkî û kulturê kurdewarî; her ca de ziwanê kurdkî û kulturê kurdewarî!

Seba ziwanê kurdkî û kulturê kurdewarî her dem têkoşîn, her dem kar û xebate!

Serkewtiş ziwanê kurdkî û kulturê kurdewarî yo!

Çime: Ajansa Mezopotamya