Komeleya Rojnamegeran a Dîcle Firatî dîyar kerd ke erdlerzî Mereşî de 25 rojnamegerî merdê, 14 rojnamegeran rê hêrîş ame kerdene û 4 hebî zî ameyê destbendkerdene.
Komeleya Rojnamegeran a Dîcle Firatî (DFG) raporê erdlerzî dima binpaykerdişê heqê merdiman ê verba rojnamegeran weşana
Goreyê raporî Semsûr de Rojnameger Burak Alkûş, Hîdayet Ozdemîr, Îskender Korkut, Kemal Oner, Muhammed Akan, Ruhî Akan, Yunus Emre Dogan, Zubeyîr Pektaş, Îsmaîl Hakki Koçak, Fatîh Bayin, Bariş Can Tabakçi, Hatay de Rojnameger Ayşe Fîgen Arl, Burak Mîllî, Gokhan Aklan, Îzzet Nazli, Neşet Alkan, Erhan Yilmaz, Mehmet Tekîn, Hasan Seîd Okay û Berkay Akay, Mereş de Rojnameger Mustafa Yuzbaşioglu, Azîz Çevlîk, Fatîh Nalbantbaşi, Adana de Rojnameger Melteme Ozgen û Dîlok de zî Rojnameger Fatma Erdogan dinyaya xo bedilnaye.
Sewbîna, raporî de ame vatene ke bi îlankerdişê Halê Îstîsnayî karê rojnamegeran yenê astengkerdene.
Dewamê eşkerayîye de ame vatene, ‘‘Dadgehê Cezayanê Giranan ê 4inî yê Anqara, keyepelê înternetî û qanalê Youtubeyî û 340 URLyî asteng kerdî. Rojnameyê Xwebûn ke rojnameyê kurdî yo û NûJINHA ke weşangerîya cinîye keno, adresê înan ê tweeterî ame girewtene. Nê şertan û astengîyan de zî rojnamegerî waran ra bîyê.’’
Goreyê raporî, aşma sibate de 14 rojnamegeran rê hêrîş ameyo kerdene, 4 rojnamegerî ameyê destbendkerdene, 19 kesî demê xebere de ameyê astengkerdene, derheqê 6 kesan de tehqîqat ame kerdene.