Hetkarê Serekê Pêroyî yê AK Partî Efkan Ala îlan kerd ke ê paweyê vengdayîşê çekronayîşî yê.
Hetkarê Serekê Pêroyî yê AK Partî weşanê zindî yê Haberturkî de rojeva Tirkîya ser o fikirê xo vatî.
Efkan Ala va:
"Ma xebatanê xo yê Tirkîyayêka bêteror rê dewam kenê. No zaf eşkera yo. Çimkî ganî Tirkîya nê kelemçeyan ra bixelisîyo.
Ma wazenê ke Tirkîya de 85 milyon hemwelatîyê ma mîyanê weşîye de cuya xo biramnê. Wa kes nêmiro, wa çimeyê ma veng meşîrê. Wa Tirkîyayêka bêteror bibo. Zaf bedel ameyê dayîş. Hem çimeyê ma yê merdiman, merdimê ma perîşan bîyî, înan cuya xo vîndî kerde."
Ala cewabê persa "Şima pawenê ke seba ronayîşê çekan vengdayîşêk bêro kerdiş?" wina da:
"Rewşa nikayêne seba texmînkerdişî munasib a. Yanî merdim eşkeno texmîn bikero ke do no vengdayîşê ronayîşê çekan bêro kerdiş, ma zî pawenê."
Hetêna ra, yeno pawitiş ke Heyetê Îmralî mîyanê çend rojan de reyna şêro Îmralî û Abdullah Ocalanî reyde pêvînayîş bikero.
Serekwekîla Koma DEM Partî ya Parlamentoyî Gulistan Kiliç Koçyîgit vizêr zîyaretanê Ocalanî ser va, "Heyeta ma mîyanê rojan de şina Îmralî."