Hemşaredarê Şaredarîya Amedî ya Şaristanê Girdî Serra Bucak û Dogan Hatun seba Roja Rojnamegeranê Kurdan 22ê Nîsane rojnamegeran reyde ameyî têhet. Hemşaredare Bucak dîyar kerd ke tarîxê çapemenîya kurdî zaf derg, zehmet û pirr o û Roja Rojnamegeranê Kurdan a rojnamegeran pîroz kerd.
Mudirîya Şûbeyê Pawitişê Ziwanî ya Serekîya Daîreya Karanê Kultur û Sosyalan, seba Roja Rojnamegeranê Kurdan 22ê Nîsane têhetameyîşê çapemenî organîze kerd. Merkezê Kongre û Kulturî yê Çand Amedî de programê ke ameyî organîzekerdene, tede Hemşaredarê Şaredarîya Şaristanê Girdî Serra Bucak û Dogan Hatun reyde Hemşaredarê Şaredarîya Baglarî Leyla Ayaz û Siraç Çelik, Hemşaredara Şaredarîya Kayapinarî Berivan Gülşen Sincar, Hemşaredara Şaredarîya Sûrî Fatma Gulan Onkol, Hemserekê Şaristanî yê Partîya Seypêyîya Şaran û Demokrasîye (Partîya DEM) Gulşen Ozer û Abbas Şahîn, hetkarê sekreterê pêroyî, serekê daîreyan, endamê meclîsî û rojnamegerê bajarî beşdar bîyî.
Hemşaredare Bucak: Nê fedakarî nêyenê xovîrakerdene
Têhetameyîşî de Hemşaredare Serra Bucak qisey kerd û dîyar kerd ke ewro 127. serrgêra weşanayîşê rojnameyê Kurdistanî yo ke hetê Miktad Midhat Bedirxanî ra Kahire de ameyo weşanayene, û Roja Rojnamegeranê Kurdan a rojnamegeran pîroz kerd. Hemşaredare Bucak ke qeyd kerd ke ewro rojêka sereberzî ya, wina qisey kerd: "Rojnameya Kurdistanî ra heta kovara Hawar, rojnameya Yeni Ulke ra heta Azadîya Welatî, no tarîx zaf derg, zehmet û pirr o. No kar seba ma hemîne pîroz o. Zaf kesî û keyeyî est ê ke no bar girewto xo mil. Înan destegêko gird dayo weşangerîya kurdî û averşîyayîşê çapemenîya kurdî. Hetanî ewro zaf xebitîyayî, zaf kede daya. Nê keyeyan ra yew zî keyeyê Bedirxanîyan o. Hetanî ewro zaf bedel ameyo dayene. Nê fedakarî nêyenê xovîrakerdene. Musa Anterî ra hetanî Gurbeteli Ersozî û hetanî ewro pêro kedkarê çapemenî û şima nê tradîsyonî dewam kenê. Roja Rojnamegeranê Kurdan wa ma hemîne rê pîroz bo."
