Mihemed Kurdî
Şampîyonîya Fitbolî ya Ewrûpayî 14ê hezîranê de dest pêkerd. Elmanya eno organîzasyonî rê (EURO 2024) mazûvantî kena, yanê turnowa Elmanya de saz bena.
Enê turnowaye de 24 tîmê futbolî yê welatan micadele kenê û yew aşme dewam keno û peynî de tîmêk do bibo şampîyonê Ewrûpa. Aye semed ra tîmê ke beşdarê enê şampîyonaye benê seba ke serkewte bibê û qupaye berz bikerê bi heme hêza xwu xebitîyenê. Enê tîman ra yew zî tîmê welatê tirkiya yo la tîma tirkîya kaykerdişê xwu yê fitbolî rê veşêr bi şer û kuwayîşiyê xwu rojevî de yo.
Seke ma pêro zî zanenê manaya fitbolî şahî ya, weşî ya, tenduristî ya, aştî ya û biratî ya. La çi heyfo ke fitbol seba tirkan wina nîyo, çimkî înan seke şinê herbî, bi dirûşm û sirûdê nîjadperestî û bi nîşaneya Vergê bozî (sembola nîjadperestîya tirkan) reyde şinê misabeqeyan. Tena hetgêrê tîma tirkîya yê bi enê awayî nîyê, eynî wextê de heme şar, artêş, hikumet û kaykerdoxê tîmê tirkîya zî bi eynî qeydeyî ewnêyêne fitbolî ra. Coka misabeqeya tirkîya û Nemsa (Awistriya) de yew kaywanê tirkiya badê ke gol eşt engiştê xwu sey goşê vergî kerd û bi enê sembola nîjadperest serkewtişê xwu pîroz kerd. Enê hereketê faşîst yê kaykerdoxê tirkîya mîyanê cemata fitbolî de bîyo sedemê bertekên wişkî. Aye semed ra zaf kes û hetê ke fitbolî ra eleqedar benê seba enê faşistîyê tirkan nerazîbîyayişê xwu ardê ziwanî û xwu ra peynî de Uefa yê kaywanê tirkiya ceza kerd.
Heto bîn ra çapemenî, şar û hikumeta tirkîya seba cezakerdişê kaykerdoxê înan UEFA protesto kerdê û seke çîyo ke baş kerdibi pêro pîya kaywanê xwu ra wayîr vejîyayê û paştiya ey kerdê. Ancî şar, çapemenî, hikumet, tîm û heme hetgirên tîmê tirkan sey ke do şirê herbî xwu bi sloganên nijadperest misabeqeya Holanda ra hedre kerdê la keyeyê Holanda awan bo vera tirkan de bi serkewt û vernîya enê faşîstîya tirkan girot û veranêda ke zilma înan zaf dewam bikero. Badê ke tirkan misabeqeya Holanda vîndî kerd hetgirên înan galeyê hetgirê Holanda kerdê û kuçeyên Elmanya têmîyan kerdê. Yanê bi kilmekî tirkan bi kerdişên xwu yên faşîst enê organîzasyona fitbolî herimna. Raşta ci baş o ke enê faşîstên tirkan turnowayê ra rew kewtê, an Homa nêkero eke enê faşîstan bibêyêne şampîyon, do şerê dinyayê bikerdêne û bivatêne ma wayîrê dinyayî yê.
Gelo Semedê Enê Nîjadperestîya Tirkan Çîyo ?
Enê şampîyonaya fitbolî bîyo sedem ke şar û welatê Ewropa riyê tirkan yê rastîn û nîjadperestîya înan baş nas bikerê, çimkî raşta ci tirkan bi kerdoşên xwe yên faşîst xwu rezîl kerdê. Dewlete tirkîya roca ke awan bîya heta nika bi pergala yewperestî yeno îdarekerdiş. Şarê tirk zî seserre yo ke bi enê pergala yewperest perwerde benê. Aye semed ra şarê tirk xwu ra veşêr sewbînan şar û ziwanan nêşinasnenê. Êdî Xerapyayîş kewto mîyanê gonîya înan, coka her cayê ke înan şinê rijnenê, wêran kenê , xirab kenê, gonî rijnenê la reyna zî çimê înan mird nêbenê û hertim xwu rê yew duşmen gêrenê. Raşta ci heta ke pergala tirkîya wina bo (yewperest ) înan do çi rey dinya de başîye nêkerê û di hertim xirabî bikerê, do hertim galeyê yê ke înan ra nîyê bikerê. Aye semed ra ganî merdim hagîdar bê û xwu enê vergê har ra bipawê.
Şarê Kurd Mecbûr Nîyê Ke Paştîya Gangêrên Xwu Bikê
Nûnerê fitbolî yê tirkîya verê cû seba tîma netewî ya tirkîya kaywanî Kurd Denîz Undawî ra teklîf berdibi la Undawî vat bi ez Kurd a û teklîfa înan red kerdibi û dima Denîz Undawî tîma netewî ya Elmanya tercîh kerdibi. Enê turnowayê de zî verê yew misabeqeyê vatoxêkî Undawî ra vat ti tirkîya ra yî , Undawî zî vat ke verî her çîyî ez Kurd a û seba tirkan zî çîyêk neyênî nê vat. La tirkê faşîst bi enê vatişê Undawî cêgirîyayê û galeyê ey kerdê û tira vatê ti bêwelatî. Ancî seba ke çend kes û hetê Kurdî vera tirkan de paştîya tîmên sey "Portekîz" û "Holanda" kerdê û vatê biciwîyo Portekîz û biciwîyo Holanda, bîyo sedemê nerazîbîyayişê û qehirîyayişê tirkan. Raşta ci ma bêwelat nîyê, welatê hetê ê kesên ke ma rê vanê şima bêwelatî de ameyê dagirkerdiş. Coka ne Denîz Undaw ne zî sewbîna Kurd mecbûr nîyê ke paşdîya tîma dagirkerdoxên welatê xwu (tirkan) bikerê, çimkî înan hertim estbîyayişê ma Kurdan înkar kenê.
Raşt ci ma ne Holandij ê û ne Portekîzij ê la senî tirk ard û asmên de duşmentîya ma kenê û nasname û ziwanê ma qedexe kenê ma zî vera înan de paştîya tîmên binê kenê, yanê nêke ma Holanda û Portekîzî ra hez kenê, ma tena bi têkşîyayîşê/binkewtişê înan zerîya xwu weş kenê.
Ez vana qey dinya de tirkan ra vêşêr sewbîna şar û dewlet çin o ke bi zilm û zordarîya xwu kêfweş û serberz bê. Raşta ci ma Kurd, tirkan baş şinasnenê, çimkî eno seserre yo ke tirkîya şerê ma kenê û gonîya ma rijnenê coka enê kerdişên înan ê faşîst ma rê ecêb nîyê la ganî şar û dewletê binê yê dinya yî zî enê faşîstîya înan bivînê û înan bişinasnê.
09.07.2024 / Mêrdîn
E-maîl: mihemedkurd47@gmail.com