DEM Partî eşkera kerd ke, Heyeta Îmraliyî seba ke bi Serekkomarê Tirkîya Recep Tayyîp Erdoganî de pêvînayîş bikı, muracatê resmî kerdo.
Hemserekê DEM Partî Tuncer Bakırhanî zî îzah kerdbi ke Heyeta Îmraliyî ewro yan zî siba do seba ke Serekkomarê Tirkîya de ziyaret biko, muracat bikero.
DEM Partî bi yew îzahat îfade kerd: "Heyeta Îmraliyî ya DEM Partî seba ke Serekkomar Erdoganî dir pêvînayîş biko, randevu wazena."
Hemserekê DEM Partî, vengdayîşê Rêberê PKKyî Abdullah Ocalanî ra dima dest bi zîyaretê partîyanê sîyasîyan kerdbî.
Tuncer Bakırhanî ewro, seredayîşê Partîya Saadetî ra dima persê xebernegiranî cewab dayî.
Hemserekê DEM Partî Tuncer Bakırhanîva: "Helbet beno ke heyeta ma bi rêzdar Erdoganî de bêro têhet. Çira ziyaret nêkero?"
Serekkomarê Tirkîya Recep Tayyîp Erdoganî, kombîyayîşê grûba partîya xo ra dima vatbi ke, eger Heyeta Îmraliyî ya DEM Partî ey ra waştişê zîyaretî bikero, o do qebûl bikero.
