Dîwanê Berz ê Edeletî yê Îranî cezayê dardekerdişî yê aktîvîsta kurde Pexşan Ezîzî qebul kerd.
Emîr Reîsîyanê avukatê Pexşan Ezîzî da zanayîş ke ewro qerarê Dîwanê Berzî yê Edeletî yê Îranî yo ke derheqê qebulkerdişê cezayê dardekerdişî yê Pexşan Ezîzî de yo înan rê ame teblix kerdiş.
Emîr Reîsîyanî da zanayîş ke Pexşan Ezîzî endama grûbanê çekdaran nîya û çalakîyê çekdarîye nêkerda.
Emîr Reîsîyanî qerarê Dadgeha Tehranî û Dîwanê Berzî yê Edeletî yê Îranî sey "vera prensîbanê muhakemekerdişî " name kerd.
Pexşan Ezîzî serra 1984î de bajarê Mehabadî yê Rojhelatê Kurdîstanî de maya xo ra bîya.
Pexşan Ezîzî beşê Karê Komelkî unîversîteyanê Tebrîz û Tehranî de qedênayo.
A 4ê Tebaxe 2023î de wexto ke keyeyê xo reyde Tehran de bîye, hetê hêzanê ewleyîye yê Îranî ra ameya tepiştişî û Dadgeha Şorişî ya Tehranî de bi îdîaya çalakîya çekdarîye ya vera hukmê Îranî ameya muhakaemekerdiş û cezayê dardekerdişî girewt.
Pexşan Ezîzî badê dest pêkerdişê şerê vera DAIŞî şîya Başûr û Rojavayê Kurdîstanî û kampanê mihaciran de sey karkerê komelkî, bitaybetî ardimê cinî û domanan kerd.
