Kajav Roder- Stenbol
No 7-8 serrî yo ke ez heme programanê Mehdî Mutluyî temaşe kena. Verê cu gelek radyo û televîzyonan de xebitîyayo û pêşkêşkarî kerdo.
Karîyerê ey yê pêşkêşkarî xeylê ecêb dest pê kerdo. Nêyeno mi vîrî kamcî bername bi la hina behsê na mesele kerdibî. Wextê unîversîteya ey de yew kanalê radyoyî pêşkêşkar gêreno. Embazê Mehdî Mutluyî zî wazeno muracat bikero, O û embazê xo pîya şonî cayê muracaatî. La wextê mulaqatî de embazê ey ney, Mehdî Mutlu bala îdarekaran anceno. Bi no hewa dest bi pêşkêşkarî keno.
Mehdî Mutlu qezaya Bedlîsî Norşîn ra yo. Norşîn xususen cayê merkezê medreseyanê Kurdan o. Mehdî zî goreyê texmînê mi tesîrê medreseyan de mendo. Bala mi ante, qiseykerdişê xo de çekuyanê erebkî zaf şuxulneno. La nara zî kirdasîya ey bi mi zaf weş yena. Ez ey pêşkêşkarî de zaf serkewte û profesyonel vînena. Xaseten qiseykerdişanê ey de henekî programanê ey hina weş kenê. Ez nê zî vaca rey-rey zî henekanê bêwext keno. Zaf reyî seba ke qiseykerdişê meymananê xo birneno şar ey rexne keno la ez nê hareketanê ey yew pol ra zî pozîtîf vînena. Bi no hewa bernameyê ey dînamîk û ganî manenî û temaşekerdoxî zî programê ey ra eciz nêbenê.
Heta nê wextanê peyênan de zî hesabê ey yê social medyayî çinêbi. Çend X ser o hesabê ey estbi zî Instagram ser o çinbi. Bi mi na kêmanîyêka muhîm a. Baş o ke hesabê xo yo Insagramî akerd û demêko kilm de bi hezaran kesî resa.
Mehdî Mutlu bi tena pêşkêşkarîya xo serkewte nîyo. Kulturê Kurdan, cografya, edebîyat û muzîkê Kurdan zî baş zano. Bi nê babetan ser o xeylê bernameyî amade kerdê. Zafî bernameyanê xo de bi meymananê xo rê tembûr ceneno. Nê wextan de çimê mi de beriqîyeno, yew profîlo qerase û cool aseno.
Zafî hunermendanê ma yê nemiran reyde roportajî kerdê. Belkî nê hunermendê ma roportajê xo yê peyênî ey reyde kerdê. Sey Beytocan, Esker Cizîrî.. Nê 6-7 serran de mi bi xo dî la bawer kena bi hunermendanê ma yê bînan reyde zî xeylê hîkaye û estanikê ey est ê. Serra 2007 de no vîdeo de o û nemir Seîd Yûsiv pîya asenê.
Huner û kulturê ma Kurdan ser o, ez bawer kena xeylê xebat û keda ey est a. Bi no şexsîyetê xo Keremê Seyadî maneno. Keremê Seyadî hizmetkarê Radyoya Erîwanî bi. Ez hêvî kena Mehdî Mutlu arşîvê heme xebatanê xo girewto û cayêk de wedarnayo. Ez seba heme xebat û keda ey bi zerrî ra sipasîya ey û ekîba ey kena. Homa ey rê emrêko derg û sihet bido.
Hewşa Remezanê 2025
Mêhvanê Remezanê
Mehdî Mutlu Urdun: https://youtu.be/J5h-rg943xg?feature=shared
Mehdî Mutlu Kurdên Urdun: https://youtu.be/6D_8q4jksQk?feature=shared
Mehdî Mutlu Kenya: https://youtu.be/JpPW_yiM_cI?feature=shared
Mehdî Mutlu û Bilind Îbrahîm 2007: https://youtu.be/M32zf3h_MhU?feature=shared
Mehdî Mutlu û Şivan Perwer https://youtu.be/8GGGu9tj22E?feature=shared
Mehdî Mutlu û Seîd Yûsiv û Hunermend Jiyan https://youtu.be/EyuTYDyaaQg?feature=shared