Mihemed Kurdî
Zemanê verênan zemanê paşa û siltanan bi. Hukimdarîye şaristan û bajaran de destê înan de bîye û selahîyetê înan zî zaf bî. Vanê rocêk, cinîya siltanekî cira vana: "Ez hînî nêeşkena bivejî teber."
Siltan vano: "Çira?"
Cinî vana: "Cinîyê şarî zî sey mi bîyê. Ez giştireyê zerdî kena engiştanê xo, ez ewnîyena ke cinîyê dewlemendan û bazirganan zî kerdê engiştanê xo. Ez bazinî kena destanê xo, kemerî xo ra dayena, la ez vînena ke yê înan zî est ê. Êdî şar mi û ê cinîyanê dewlemendan yewbînan ra cêra nêkeno. Na rey ez nê çîyan qebûl nêkena. Mîyanê cinîyan de qedr û qîmetê mi nêmend. Coka ganî ti nê derdî rê çareyêk bivînî."
Siltan zî hema bi lezabez veng dano merdimanê xo û înan rê vano: "Ferman bidê û bivajê ke nika ra dima şaristanê ma de qedexe yo ke cinî zerdî xo ra bikerê/bidê."
Merdimî fermana siltanî bi ca ardî û derheqê bira newî de şar agahdar kerdî. La her çi cinîya ke fermana siltanî eşnawite, nêrazîbîyayîşê xo mojna û vate: "Ma qebûl nêkenê! Na çi bira Siltanî dayê? Çi rey zerdî cinîyan rê qedexe benê?"
Cinîyan heme cayanê şaristanî de vera na bira Siltanî de vengê xo berz kenê.
Badê ke wezîran zî vengê cinîyan eşnawit, şîyê hetê Siltanî û cira vatî: "Ez xulamê to, çira to wina kerd? Armancê to çi yo? Ti çira ma ra nêpersena û nêvana ez do filan çîyî bivaja? O çax ma zî do to rê bivatêne xelet o yan zî rast o. To verê ma de armancê xo ma rê bivatêne, ma zî do bi awayêko bînî bivatêne to xelet vato."
Siltanî vat: "Senî yanê?"
Wezîrî vat: "Eke to bivatêne; nêbeno ke cinîyê rindekî zerdî xo ra bikerê/bidê, tenya cinîyê pîs eşkenê zerdî xo ra bikerê/bidê, o çax perse do nêvirazîyayêne û yewê zî vengê xo nêkerdêne."
Siltanî vat: "Mi na nêzanayêne."
Wezîrî vat: "Eke to nêzanayêne, çira to ma rê nêpersa û hema wina lezabez bire da?"
Siltanî vat: "Raşt o, ganî mi şima rê zî bivatêne, la çîyo ke şî dima mekewe, ma nika se bikerê?"
Wezîr vano: "Eke ti biwazî ez eşkena viraza."
Siltanî vat: "Hema ti serbestî, şo viraze, ti senî virazenî, viraze."
Na rey wezîrî veng da şarî û vat: "Cinîyê ma yê ercaye, Siltanî bira xo biney bedilna û vat ke: Nika ra dima cinîyê ke rindek nîyê eşkenê zerdan pa bikerê, la yê ke rindek ê xora rindek ê. Na rey do semedê çi zerdîan pa bikerê?"
Roca binê cinîyêka tenya zî giştireyêk nêkerda engiştê xo, çimkî cinîyêka tenya zî nêvana ez bêrûçika (pîs). Heme zî xo sey horîyanê behiştê vînenê û heme xo ra razî yê. Peynî de veng cinîyan ra birrîya û şaristanî de zerdî tenya cinîya Siltanî rê mendê.
Manaya nê meselaya na ya: Ganî merdim çi rey rew/lez bira/qerarê nêdê. Hertim wextê musaîdî bido, çimkî bira rew beno semedê poşîmanî û xeletîyan. Merdim çendêk zana bo wa bibo, reyna zî ey ra merdimê zanayêr estê. Aye semed ra verî ke merdim çîyêko bikero ganî bi merdimanê dorûverî reyde mişewre bikero û dima fikrê kamcînî weş bi, wa bi yê ci bikero. Yew vateyêka ma yê verênan est o, vano: "Dinya ra biperse, la bi yê xo bike."
