Mela Muhsîn Hendrîcks, melayê homoseksuel (hemzayend) yo verên, Afrîkaya Başûrî de ame kiştene.
Polîsê Afrîkaya Başûrî eşkera kerd ke, wexto ke Mela Muhsîn Hendrîcks otomobîl de bi, hetê tayê kesanê ke nasnameyê înan nêzanîyeno ra bi tifing ame kiştene.
Polîsan va ke, ê sebebê kiştişî ser o cigêrayîş kenê labelê ê tersênê ke êrîş, êrîşêko nefretî bo.
Komeleya LGBTÎ+ şermezar kerd
Komeleya Mîyanneteweyî ya Lezbîyen, Gay, Bîseksuel, Trans û Înterseksî (ILGA World) beyanatêk vila kerd û kiştişê Mela Muhsîn Hendrîcksî şermezar kerd.
Mudira ILGA Worldî Julia Ehrtî beyanat de va: "Sey keyeyê ILGA Worldî ma xebera kiştişê Muhsîn Hendrîcksî bi şok û xemgînîyêka xorîne hesna. Ma wazenê ke rayedarî nê hedîseyî ser o bi detay cigêrayîş bikerê."
Ame dîyarkerdene ke Hendrîcksî cuya xo ya pêroyine de seba heqanê LGBTÎ+ û mesela Îslamî têkoşîn kerdo û seba pawitoxanê heqanê merdiman yê cîhanî bîyo nimûneyêko muhîm.
Muhsîn Hendrîcks Kam o?
Muhsîn Hendrîcks 1967î de Cape Townê paytext a Afrîkaya Başûrî de ameyo dinya, yew keyeyo musluman de pîl bi.
Hendrîcksî Unîversîteya Îslamî ya Pakîstanî de Erebkî û Huquqê Îslamî wendo. Serra 1991î de yew cinî reyde zewicîya û hîrê domananê ey bîy.
Labelê, ê serra 1996î de yewbînan ra cîya bîy û ey dîyar kerd ke o homoseksuel o.
No vatiş bi sebeb ke o wezîfeyanê xo yê dînî ra bêro dûrîvistiş û keyeyê xo reyde kewt yew demo zor.
Heman serre de rêxistina bi nameyê "The Inner Circle" awan kerde û dest bi piştgirîya Muslumananê LGBTÎ+ kerd.
