Eyyup Demîr
Heyeta Îmralî ya Partîya DEMî zîyaretê xo yê partîyanê sîyasîyan ê ke parlementoyî de yê qedênayî.
Heyeta Îmralî roja Şeme do Hemserekê verênî yê HDPî Selahattîn Demîrtaşî û roja Yewşeme zî zîyaretê Hemsereka verêne ya HDPî Fîgen Yuksekdag zîyaret biko. Nê zîyaretan ra dima ke do mesajanê Serekê PKKî Abdûllah Ocalanî ser o bêro vindertene û pêşnîyazî bêrê kerdene, do zîyareto dîyin yê Îmralî bêro kerdene.
No proses hetê partîyanê Kurdan ra zî nêzdî ra yeno teqîpkerdiş. Heta nika Heyeta Îmralî qet partîyanê Kurdan reyde pêvînayîş nêkerd.
Partîyê Kurdanê ke parlementoyî de nîyê zî gazincan kenê û vanê ke eke meseleya Kurdan ser o wazîyeno ke çareserîyêk bêro kerdene, ganî mutabeqatêko pêroyî mîyanê komelî de bêro awankerdene.
Serekê Pêroyî yê Partîya Welatparêzanê Kurdîstanî (PWK) Mustefa Ozçelîkî Dengê Amerîka rê îfade kerd ke hetê Heyeta Partîya DEMî ra înan rê qet waştişêkê pêdîyayîşî nêameyo.
Mustafa Ozçelîkî va "Heta nika heyeta Partîya DEMî qet waştişêk ma ra nêkerd. Helbet keyberê ma akerde yo, eke biwazê ke partîya ma bivînê ma do fikre xo înan rê vaje. Seba caverdayîşê çekan yê PKKî ma nê averşîyayîşî muhîm vînenê. La ganî Partîya DEMî bizano ke meseleya Kurdan meseleya yew partî nîya, yan meseleya yew kesî nîya,"
Ozçelîkî, rewşa peyêne ya Tirkîya ser o zî vindert. Goreyê ey Tirkîya nê deman de mîyanê tengîyêka zaf gird de ya, coka zî seba ke xo na tengîye ra vejo nê rayîrî ceribînena.
Ozçelîkî wîna dewam kerd:
"Tirkîya sebabîyayîşanê peyênan kewta mîyanê tengîye û amancê aye de zî Rojavayê Kurdistanî esto. Wazena ke tîya de zafêr destkewteyan bigîro, coka zî no proses daya dest pêkerdiş. La ganî Kurdî nê warî de xo ra hayîdar bê. Kurdistanî de her çî zaf zelal o, ganî ewro ENKS, PYD û partîyê bînî yê Kurdan yew bernameya neteweyî ser o têkilîyanê xo xurt bikerê û Amerîka, Îsraîl, Brîtanya, Fransa û welatanê Rojawayî reyde têkilî ronê, tenya Şamî reyde nê,"
Serekê Partîya Azadî û Heqan (Hak-Par) Duzgun Kaplanî zî nê warî de fikir û hîsê xo pare kerdî. Kaplan îfade keno ke ê paştgirîya caverdayîşê çekan kenê, la ê meseleya Kurdan cayêko bîn de vînenê.
Duzgun Kaplanî va "Seba ke fikrê ma bêro girewtene, heta nika têkilîya Partîya DEMî ma reyde çinê bîya. La binê zîyaretê Partîya DEMî de terkê çekan ca gêno. Her çi bo zî ma piştgirîya nê hewldayîşî kenê. Xora şuxulnayîşê çekan Kurdan rê fayde nêano. O zerar dano. Nê pêvînayîşan de meseleya Kurdan ser o çîyêko newe çin o. Xora kes nê warî de çîyêk zî nêvano. Eke ma ra biameyêne perskerdiş ma zî meseleya Kurdan ser o fikre xo bivatiynê,"
Serekê Pêroyî yê Partîya Sosyalîste ya Kurdistanî (PSK) Bayram Bozyel zî îfade kerd ke mîyanê nê roniştişan de çareserkerdişê meseleya Kurdan ca nêgêno.
Bayram Bozyelî wîna va
"Tîya de çareserkerdişê meseleya Kurdan çin a. No ne fekê Bahçelî ra ne zî fekê Erdoganî ra vejîno. Ê tenya behsê terkê çekanê PKKî û safîkerdişê terorî kenê. Beyanatê Ocalanî de zî meseleya Kurdan ca nêgêna, çîyê umûmî û pêroyî estê. Raştîya xo dewlete wazena ke tîya de Rojava ser tesir bikero û tîya de goreyê xo dîzaynêk pêbîyaro. Ganî Kurdî nê warî de hişyar bê û Rojava rê wayîr vejîyê,"
Çimeyê xebere: VOA Kurdî
