Platforma Pawitişê Hewza Kasora Pasûrî ke vera xebatanê madenî ronîyayîş, ewro pasûr de yew beyanat da. Wazîyeno ke ocaxê madenî mintiqaya Gavgas, Kûyê, Awdegês, Arqetîn û Xuruçî de berê ronayîş. Beyanat dewa Awgêdasî de ameye dayîş.
Parlamenterê DEM Partî, Hemşaredarê Bajarê Girdî yê Amedî Dogan Hatun, hemşaredarê qezayan, temsilkarê sazgehê sivîlan û partîyanê sîyasîyan ê zaf qezayan û felek şêlikê amey cayê dayîşê beyanatî. Beyanat de sloganê "Tebîatê ma xoserîya ma yo. Tebîatê ma estbîyayîşê ma yo, ma sereyê xo nêtewanê" ameyî berz kerdiş û pankartê "Ma rayîr nêdanê talankerdişê tebîatî ", "Sermaye Pasûr ra dûr kewê" û "Pasûr madenî ra muhîmêr o" ameyî akerdiş.
DO AWA 25 HEZAR KESAN BIPÊSO
Sekreterê Komîsyonê Dorûverî û Bajarî yê Baroya Amedî Ahmet Înanî da zanayîş ke awa 25 hezar kesan ke mintiqaya Hewza Kasorî ra yena temînkerdene û eke na ocaxa madenî dewam bikero do awa 25 hezar kesan bipêso.