Derheqê xebatanê zazakî de yewna gama muhîme erzîyaye. Bi nameyê Zazano yew applîkasyonê zazakî ame viraştiş. No applîkasyono ke warê xo de tewr verên o, vizêrî ra nata xizmetê zazayan de yo.
Herçiqas çend applîkasyonê kurdkî (kurmancî, soranî) est ê zî heta nika formatê applîkasyonî de yew ferhengê zazakî çin bî. Zazano ke di ferhengê Grûba Xebate ya Vateyî ci rê sey binge ameyê girewtiş, hetê yew ekîba ke mamostayê ziwanî Mutlu Canî tede sey koordînator ca girewto ra hadre bîyo.
Zazano, Androîd û AppStore de ca gêno û kam ke biwazo eşkeno bê destmizî (ucretî) telefonê xo yê destan ro bîyaro war. Zazano ke eynî wext de adresa zazano. org de sey keyepel zî aktîf o, ferhengan ra teber Rêberê Rastnuştişî yê Grûba Vateyî zî îhtîva keno.
Semedê lînkê Androidî bitikne: ZAZANO
Semedê lînkê AppleStore bitikne
Semedê keyepelê Zazanoyî bitikne
Koordînatorê projeyê Zazano’yî Mutlu Canî derheqê Zazano’yî de Zazakî Newsî rê qisey kerd.
Mutlu Canî da zanayîş ke înan sey ekîbe 5 aşman ra ver dest bi hadrekerdişê xebata Zazano’yî kerda û va, “Zazano Yew applîkasyonê ferhengî yo. Eslê ci de di ferheng ê; tirkî-zazakî û zazakî û tirkî. Avantajê Zazanoyî yo gird no yo: Bi no hawa her kes do bieşko her cayê dinya ra xo biresno ferhengê zazakî û êdî çi wext ke îcab bikero ferhengê ma do destê ma de bo.”
Mutlu Canî da zanayîş ke Zazano seba destekdayîşê musayîş û averberdişê ziwanî yo û wina dewam kerd. Hêvîya ma na ya ka kesê ke wazenê zazakî bimusê yan zî wendiş û nuştişê xo aver berê, ci ra îstîfade bikerê.”
Ma derheqê xebata Zazano’yî de Mutlu Canî reyde qisey kerd û cewabê ey yê derheqê Zazano’yî de şima reyde pare kenê.
Zazakî News: Gelo no fikir to de senî peyda bi?
Mutlu Can; Eslê xo de no fikir zaf verê cûyî ra aqilê mi de est bî, labelê mi vatêne qey malîyetê ci zaf-zaf zêde bo, naye ra ez nêkewta dime. Demeyêk verî bi nameyê Orhan Kayayî yew nasê mino ke o bi xo Xozat ra yo û serranê 1970yî ra nata Hollanda de ciwîyeno, mi ra persa va, gelo sey applîkasyonî yew ferhengê zazakî est o? Mi va ney, heyf ke çin o. La herhal ci rê butçeyêka zaf-zaf pîle lazim bo. Xulasa Kayayî va to rê zehmet bicigêre, hela kam keno, çi mudetî de û bi çiqasî keno, ez wazena ke bedelê ci bigîra xo ser, ma virazîme. Axir sayeyê teşebusê ey de hîkayeya Zazanoyî teqrîben 5 aşman ra ver dest pêkerde.
Zazano çi yo, merdim senî tira feyde gêno, kamca de est o?
Mutlu Can; Zazano senî ke ma keyepel û applîkosyonî de zî nuşto manaya xo tirkî de Ey Zazalar o. Seba ke nameyê şarê ma hîna zaf sey Zaza vila bîyo, ma no name tercîh kerd. Yew applîkasyonê ferhengî yo. Eslê ci de di ferheng ê; tirkî-zazakî û zazakî û tirkî. Nê her di ferhengî yê Grûba Xebate ya Vateyî ke şekle matbûyî de zî pîyaseyî de est ê. Ma tede sey çimeyî na grûbe nîşan daya. Seba ke koordînator ez bîya her prosesî reyde ez eleqedar bîya. Verê ke ma na xebate bikerê, mi semedê xebitnayîşê ferhengan nameyê Grûbe ser o M. Malmîsanijî ra destûr girewt. Xora applîkasyon û keyepel bê destmiz (ucret) o. Bêguman xayeyê ma yo tîcarî çin bî, coka ma nêwaşt ke tede reklamê tîcarî zî ca bigîrê. Eke ez bêra faydeyî ser, fonksîyon û faydeyê ferhengî her ziwanî de çi yo, ma rê zî faydeyê xo do o bo. Avantajê Zazanoyî yo gird no yo: Bi no hawa her kes do bieşko her cayê dinya ra xo biresno ferhengê zazakî û êdî çi wext ke îcab bikero ferhengê ma do destê ma de bo
Şima hetê nuştişî ra rastnuştişê Vateyî esas girewt?
Mutlu Can; Ya, çunke xora Ferhengî yê Grûba Xebate ya Vateyî yê. Yanî cewabê nê persî destpêkî ra dîyar (bellî) beno. No nîyan de ma keyepel û applîkasyonan de ca da Rêberê Rastnuştişî yê Grûba Xebate ya Vateyî zî.
Amancê şima çi yo şima bi na xebate wazenê xo biresnî çend kesan û faydeyê Zazano do çi bo?
Mutlu Can; Amancê xebata ma yanî amancê Zazanoyî seke ma uca ra zî nuşto zêdnayîşê nîsbetê musayoxan û wendoxanê kirmanckî (zazakî) rê destek dayen a. Hêvîya ma na ya ka kesê ke wazenê zazakî bimusê yan zî wendiş û nuştişê xo aver berê, ci ra îstîfade bikerê. Bi nê wesîleyî ez wazena vaja ke na xebate xebatêka kolektîf a. Bê mi tede keda hîrê embazan est a; Orhan Kaya (sponsor), Mesut Bîlîr (Muhendisê Çîynermî) û Sezgîn Firat (Edîtor). Ez nameyê xo û yê şarê ma ser o înan rê zaf sipas kena.
Dîjîtal de cagirewtişê zazakî muhîm o. Gelo ti dijitale de asîyayîşê Zazakî senî vînenê?
Mutlu Can; Rast o, sey her warî, warê dîgîtalî de zî cagirewtişê zazakî muhîm o. Çunke her çîyî ra ver reseno her cayî û tesîrê xo yê pozîtîfî zaf ê. Aye ra averşîyayîşê zazakî de yewna çîyo elzem zî her tewir xebatê Înternet û dîjîtalî yê. Ke yew nimûneya nê warî zî zazakinews o. Kesê ke na mesela xo rê mal kenê, -tabî ganî sewîyeya zanayîş û îmkanê înan nê tewir karan rê qîm bikero, bes bo- eke dest bierzê nê karan zaf baş beno. Ancîna eke ziwanê ma de çeşit û hûmara nê xebatan bizêdîyê faydeyê înan do helbet ke est bo.
Bilhuda Doğan çit
