Derheqê Hemşaredaranê Şaredarîya Akdenîzî Hoşyar Sariyildiz û Nurîye Aslan de qerarê tepiştişî ame Dayene.
Mersîn de 10ê Çeleyî de operasyonê keyeyan de Hemşaredarê Şaredarîya Akdenîzî Hoşyar Sariyildiz û Nurîye Aslan û endamê Meclisê Şaredarîye Ozgur Çaglar, Neslîhan Oruç, Yakup Daniş û Hîkmet Bakirhan hakimîye ver de îfadeyê înan ame girewtene.
Dozgerî bi şahidê nimite waşt ke Hemşaredarî Hoşyar Sariyildiz û Nurîye Aslan û endamê Meclisê Şaredarîye Ozgur Çaglar seba "endametîya rêxistine", "dayîşê destegê malî yê rêxistine", "propagandaya rêxistine" û "vera qanûnê 2911î" û endamê bînî zî seba "endametîya rêxistine" bêrê tepiştiş. Hakimîya Nobedarî ya Dadgeha Ceza ya Pêardişî bi nê îddayan hemşaredarî Hoşyar Sariyildiz û Nurîye Aslan û endamê Meclisê Şaredarîye Ozgur Çaglar, Hîkmet Bakirhan û Neslîhan Oruçî rê qerarê tepiştişî da û qeyyûm eşt şaredarîye ser.
Endamê Meclisê Şaredarîye Yakup Daniş bi kontrolê edlî ame veradayene. Şaro ke vera dadgeh de pawitêne qerarî rê reaksîyon nîşan da. Şarî bi sloganê "Em ê bi berxwedanê bi ser bikevin (Ma do bi xoverdayîşî ser bikewê)" beyanatê çapemenîye da.
'Ma nê qerarî qebul nêkenê'
Hemsereka Partîya DEMî ya Mersînî Bedrîye Kuş zî va "Embazê ma bi qerarêko sîyasî ameyî tepiştiş. Înan qet yew suc nêkerdo. Bi sedemanê viraşteyan ameyî tepiştiş. No şar do reyna cewab bido nê polîtîkayanê viraşteyan. Ganî no qeraro bêhuqûq bi lez bêro peysergirewtene, ma nê qerarî qebul nêkenê. Ma paştî danê têkoşînê embazanê xo. AK Partî rejîmê qeyyûman o. Mirdî nêbenê. Her çîyê şaredarîyan hetkaranê xo rê pêşkêş kenê."
