Qeyûmê Xelfetî nuşteyê "Şaredarîya Xelfetî" yê ke hesabê resmî yê X yê şaredarî de bî, wedart.
Wezaretê Karê Zereyî yê Tirkîya 4ê Kanûne de bi yew beyanatê nuştekî da zanayene ke înan qeyûm tayînê şaredarîyanê bajaranê Mêrdîn û Êlih û qezaya Xelfetî ya Rihayî ke destê DEM Partî de bîy kerdo.
Walîyê Mêrdînî Tuncay Akkoyun cayê Hemserekê Şaredarîya Bajarê Girdî yê Mêrdînî Ahmet Turk de ame tayînkerdene.
Hemsereka Şaredarîya Êlihî Gulistan Sonuk karî ra amey dûrvisnayene û Walîyê Êlihî Ekrem Canalp bî qeyûm.
Winî zî Hemserekê Şaredarîya Xelfetî Mehmet Karayilan karî ra ame dûrvisnayene û Kaymaqamê Xelfetî Hakan Başoglu bî qeyûm.
Wexto ke Şaredarîya Xelfetî destê DEM Partî de bî, hesabê xo yê resmî yê X de bi Kurdkî "Şaredarîya Xelfetî" û "Hesabê resmî yê Şaredarîya Xelfetî yê X" ameyêne nuştene.
La her di nuşteyê Kurdkî ameyî wedartiş û tenya Tirkîya nê nuşteyan mende.
Dima ra nuşteyê "Hesabê resmî yê Şaredarîya Xelfetî yê X" reyna ame ronayene la îbareya "Şaredarîya Xelfetî" nêame nuştene.
Qeyûmê Êlihî zî verê her çî Kurdkî website ra wedartbi.