Jîyat Gêlij – Mêrdîn
Rencber Ezîz serra 1955 de Çewlîk de dewa Wusfan (Aşağı Akpınar) de ameyo dinya. Hema ke yewserre beno çimanê ey de nêweşîya ke xidar peyda bena. Seba na nêweşîye ra herdi çimanê xo zî vindî keno, şewqa rojî ra bêpare maneno û Rencber debîyeno yew tarîtîya xorînî mîyane.
Badê korbîyayîşî Rencberî ra dima pîyê ey Hecî Fîlît hîna zaf ey reyde eleqedar beno. Rencber hetê hîsîyatê vengî ra zaf serkewte beno. Seba no taybetmendîyê ey ra pîyê Rencberî ey şiraweno medrese ke bibo hafizê Quranî. Rencber medrese de hema şenikîya xo de dest bi hafizî keno. Rojêk pîyê ey Renberî rê yew teyp erêneno. Rencber vengê Quranî na teyp de goştareno û bi no hewa dersanê xo ezber keno. Rencber, medresa ra teber wextanê xo yê venginan de zî suka Çewlîkî de taye embazanê xo reyde roşeno. Nê embazê ey sazî reyde mijûl benê û kilaman vanê. Rencber, tewr vernî hetê nê embazanê xo de sazî şirasneno.
Serra 1971 erdlerzê Çewlîkî de Rencber Ezîz maya xo vindî keno. Na serre seba ey giran vîyarena. Badê tehsîlkerdişê medreseya Çewlîkî Rencber seba ke îlmê xo bizêdno vera xo dano bajarê Stenbol. Stenbol de tahsîlê medrese rê dewam keno. No bajar de xeylê embazê ey benê û hetê sosyalî ra derûdormereyê ey hîra beno. Stenbol de zî hem tehsîlê medrese vîneno hem zî wazeno saz weş bander bibo. Rojêk bi sazê xo şono medrese la na hereketa ey reyde tehsîlê medreseya ey qedîyena. Qeydê medreseya ey birîyeno û medrese ra yeno qewirnayîş. Stenbol de taye cemîyetan de xebitîyeno. Nê cemîyetan ra yew Cemîyetê Koranê Şeş Noqtayî (Altı Nokta Körler Cemiyeti) beno. No cemîyet de hem wendiş û nuştiş bander beno hem zî taye fealîyetanê cemîyetî de ca gêno. No cemîyetî de taye wextan seba ke debara xo zî bivîno mabeynê Karaköy ü Kadıköy de mîyanê vapuran de xebitîyeno, maqbuzanê cemîyetî roşeno.
Wextêk nê karî keno rey-rey zî şarî rê derheqê rewşa sosyalî de zanayîşan dano. Seba nê faalîyetanê ey ra yeno binçimkerdiş û seba propagandaya komînîzmî ra ey rê 7 aşmi û 9 rojî cezaya hepisî yena dayene. Seba hepis, neheqîye û zordarîye ra serra 1978 de Tirkîya ra koç keno şono Almanya. No cayo newe de xo rê cuyêk newe awan keno. Ziwanê almankî bander beno û senet û hunerê xo rê dewam keno. Rencber Ezîz, koçbîyayîşê Almanyayî ra des serri dima serra 1988 de na rey dinya ra koç keno û şono dinya ya ebedî.
Rencber Ezîz peya xo de tena saz û kilamê xo verdayê. O hem kirdkî hem zî kurmanckî kilamî vatê. Kilamê ey zafane mîyanê cuya şarî ra bî. O eşqê welatê xo bi çimanê xo yê tarîyan ardê ziwan. Hesret û heskerdişê welatê ey her tim zerrîya ey de bi. Xora nameyê albuma ey zî “Hesreta Azadî” bena. Na albuma ey serra 2013 de hetê Medya Müzik ra ameya barkerdene. Na albüm de 13 kilamî estê. Xeyrê nê kilamanê ey, sewbî kilamê ey zî estê.
Derheqê Rencber Ezîzî û cuya ey de hetê Doğan Karasu ra kitabêk zî ameya nuştene. No kitab hetê weşanxaneyê vateyî ra, serra 2012 de ameya çapkerdene. Rencber Ezîz,nika qebrîstanê dewa xo, dewa Wusfan de meftun o. Nuşteyo ke kerreya mezelê ey ser o ameyo nuştiş bi kilmî cuya ey nîşan dano û zerrîya merdimî zîz keno. “Ey reywan vinde, mi 32 serrî rîyê roşnîye nêdî. Qîymetîya roşnîye bizane…”
Kilamê Rencber Ezîz î – Albuma Hesreta Azadî
1- Rencber Ezîz - Hemal Seyfo
2- Rencber Ezîz - Merheba
3- Rencber Ezîz – Îna Kênek Kûmca Ra Wa
4- Rencber Ezîz – Ez Nêweş a
5- Rencber Ezîz – Way Way Nînna
6- Rencber Ezîz – Bira Wo
7- Rencber Ezîz – Dilo Dilo
8- Rencber Ezîz – Nazewcim
9- Rencber Ezîz – Bîngol Şewitî
10- Rencber Ezîz – Lo Lo Bira
11- Rencber Ezîz – Lo Halê Min
12- Rencber Ezîz – Welatê Me Kurdistan e
13- Rencber Ezîz – Hesreta Azadî
Sewbîna Kilamê Ey
1- Rencber Ezîz – Dezawo
2- Rencber Ezîz – Çira Çira
3- Rencber Ezîz - Zirav
4- Rencber Ezîz – Şino Şino
5- Rencber Ezîz – Lorî Lorî
6- Rencber Ezîz – Derdo Giran Faşîzmo
7- Rencber Ezîz – Lê Nazê
8- Rencber Ezîz – Vur Dumana Gel İmana
9- Rencber Ezîz – Doktor Bey
10- Rencber Ezîz - Ateşli
11- Rencber Ezîz – Mavi Mavi Masmavi