Teşkîlatê Sûrîye yê Heqanê Merdiman (SOHR) roja Pancşeme îlan kerd ke çekdarê grûba "Artêşa Neteweyî" ya ke Tirkîya piştgirîya înan kena, dewanê vakurê Efrînî de tecawuz û binpêkerdişê heqan rê dewam kenê.
SOHRî eşkera kerd ke çekdarê "Artêşa Neteweyî" dewanê Xerab Selûk, Qerrah Bab û Meydan Îkbîs yê qezaya Reco ya ke vakurê Efrînî de yê, eşt çend keyeyanê kurdan ser.
SOHRî va: "Çekdaran eşt keyeyanê welatîyanê ser kurdan û nê keyeyan de îşkence kerd. Eynî wext de yew cinîya hemile zî seba şîdetê êrîşkaran domana xo vîndî kerde."
Goreyê SOHRî 31ê Çeleyî de çekdarê Firqeya "El-Hemzat"î dest na 83 gayanê yew sivîlî yê dewê Besleheya ya qezaya Şêrawa ya dormeyê Efrînî ser.
SOHRî va: "29ê Çeleyî de zî çekdarê Firqeyanê 'El-Emşat' û 'El-Hemzat'î eşt keyeyê yew welatîyî ser û toxim û toximê genim û keye talan kerdî, û seba tersnadişê roniştoxan mermîyê hewayî teqnayî. Çekdaran şewe de eştî keyeyanê bînan ser û dest na çîyê ke nê keyeyan de bî pêro ser."
Rêxistinî eşkera kerd ke çekdarê "El-Emşat"î dewê Qerzahilî qezaya Şêrawa de zî berhemê 200 darê zeytûnan û 250 darê hermêyan talan kerdî û çekdaran tehdîtê remnayîş û îşkencekerdişî wayîranê nê keyeyan rê kerd, eke ê şîkayet bikê.
Teşkîlatê heqan bale ante ke grûbê çekdarî yê ke girêdayeyê Tirkîya yê sebebê ke heq û ceza çin o ra binpêkerdişê bajar û dewanê Efrînî dewam kenê.
Cayê vîrardişî yo ke dewleta Tirkîya û grûbê çekdarî yê ke girêdayeyê aye yê badê êrîşêkê 2 aşmî, Adara 2018î de herêma Efrînî ke zafaneya şarê aye yo kurd bi bi zorî ameyî koçkerdiş, girewte binê kontrolê xo.