ZAZAKÎ NEWS - Goreyê îstatîstîkanê Bankaya Merkezî ya Tirkiya, deynê kredîyan ê welatîyan o ke hetê bankayan ra nêno girewtene û şîrketanê xusûsîyan rê ameyo rotiş, resayo 79 milyar lîrayan û no zî teqrîben keno 2 milyar dolar.
Goreyê Raporê Qerardarîya Fînansî yê Bankaya Merkezî ya Tirkiya, bankayanê ke nêeşkayê deynê kredîyan ê 2 milyon û 76 hezar kesan bigêrê, no deyn roto "şîrketanê îdarekerdişê varlixan."
Deynê kredîyan ê welatîyan o ke nêno dayene, 3 aşmanê verênan ê serra 2025î de 62 milyar lîrayan ra vejîyayo 79 milyar lîrayan.
Nê şîrketê xusûsîyî, deynê welatîyan o ke nêno dayene, bi fîyatêko ercanêr bankayan ra erînenê û deyndaran reyde wext û planê deynî newe ra sererast kenê.
Goreyê amaranê tewr peyênan ke hetê Heyeta Nizimkerdiş û Kontrolkerdişî ya Bankayan (BDDK) ra ameyê aşkerekerdene, hûmara deynê welatîyan ê ke bankayan derheqê înan de teqîbato qanûnî dayo destpêkerdene, serrêka peyêne de %93 zêde bîya û resaya 407 milyar û 376 mîlyon lîrayan. No zî 10 milyar dolaran ra zêde keno.
Zafê nê deynan ê şexsan ê û deynê kredîyanê xerckerdişî û kartanê kredî yê ke binê teqîbî de yê, resayo 172 milyar û 96 mîlyon lîrayan û no zî 4 milyar dolaran ra zêde keno.
Deynê şexsan yew serre de %166,7 zêde bîyo.
Pisporê ekonomîye hişyarî danê û vanê ke, zêdebîyayîşê deynanê ke binê teqîbê qanûnî de yê, seba halê ekonomîkî yê endamanê keyeyan (malbatan) û sîstemê bankayan problemanê pîlan ano pê xo.