ZAZAKÎ NEWS - Goreyê Konfederasyonê Sendîkayan ê Mîyanneteweyî (ITUC), Tirkiya emser heqanê karkeran de, mîyanê 151 welatan de mîyanê 10 welatanê tewr xiraban de ca gena.
Konfederasyonê Sendîkayan ê Mîyanneteweyî (ITUC) rapora xo ya derheqê heqanê karkeran de vila kerde.
Goreyê raporî, Tirkiya heqanê karkeran de, 151 welatan ra mîyanê 10 welatanê tewr xiraban de ya.
Tirkiya heqanê karkeran de, welatanê sey Bangladeş, Belarus, Ekvador, Misir, Esvatînî, Myanmar, Nîjerya, Fîlîpîn û Tunus reyde eynî kome de ca gena.
Rapor de, derheqê 6 hezar û 750 karkeranê ke endamê Konfederasyonê Sendîkayanê Heqan ê Karkeran ê Tirkiya yê û Adara 2024î ra nata kar ra ameyê vetene, înan ser o zî malumatî estê.
Rapor de ame vatiş ke Tirkiya û Bakurê Kurdîstanî de 30 hezarî ra zêde karkerî mecbûr ameyê verdayene ke sendîkayanê heqan ê karkeran ra îstîfa bikerê.
Goreyê raporî, 151 welatan pêro pîya ra, %72yê înan de resayîşê karkeran bi edaletî sînorkerde mendo.
%87ê nê welatan de heqê grevî yê karkeran ameyo binpaykerdene û %74ê înan de zî verê qeydkerdişê qanûnî yê sendîkayan ameyo girewtene.
Konfederasyonê Sendîkayan ê Mîyanneteweyî (ITUC) rapora xo de aşkere kerdo ke 71 welatan de karkerî ameyê tepiştene û na hûmare goreyê serra 2014î di qatî zêde bîya.
