ZAZAKÎ NEWS - Wezaretê edeletî yê Tirkîya seba hepsîyan amadekarîya qanûnêk keno ke demê "veradayîşê bikontrol" vejo 3 serran û na çarçewa de 55 hezar hepsî bêrê veradayene.
Wezaretê Edeletî yê Tirkîya xebatê Paketa Dadwerîya Cezayî ya derheqê muhakemekerdişê cezayî de temam kerd.
Goreyê projeyasayî, rayîrê vernîya veradayîşê nêzdîyê 55 hezar hepsîyan yeno akerdiş.
Projeyasa bi amancê kêmkerdişê qelebalixîya hepsxaneyan de ameya amadekerdiş û bi destûrê Serekkomarê Tirkîya Recep Tayyîp Erdogan do Parlementoyê Tirkîya rê bêro pêşkêşkerdiş û bidîyo raydayîş.
Goreyê projeyasayî, seba hepsîyê ke verê 31ê Temuza 2023î suc kerdo û hîna zî hepsxane de yê, demê "veradayîşê bikontrol" do bibo 3 serrî.
Hepsîyê ke 3 serrî cezayê înan mendo do bêrê veradayene
Bi no qayde do hepsîyê ke 3 serrî cezayê înan mendo bêrê veradayene.
Goreyê medya Tirkîya, projeyasa de seba hepsîyê nêweşî zî xalek esta la na projeyasa hepsîyê sîyasî ke "sûcê terorî" ra ceza girewtê nêgêna xo mîyan.
Heto bîn ra, roja Îne 18ê Nîsane yeno vatene ke Wezîrê Edeletî Yilmaz Tunç do heyetê DEM Partî yê Îmralî reyde pêvînayîş bikero û problemê hepsîyê nêweşî do no kombîyayîş de bêro rojev û nê wareyî de çareserîyek bêro dîyayene.
Hepsxaneyan de qelebalixîyêka zêde esta
Goreyê îstatîstîkanê Rayberîya Pêroyî ya Hepsxaneyan, cayê mendişî 300 hezar kes o, la nika nêzdîyê 403 hezar hepsî estê.
Goreyê kapasîteyî 103 hezar hepsîyê zêde estê.