Amedspor semedo ke zemînê stadyumê Dîyarbekirî xirab o û hetanî nika nêameyo viraştiş Dîyarbekir de yew beyanat da çapamenî.
Beyanatê hetê Serekê Odaya Sanayî û Bazirganî ya Amedî (DTSO) Mehmet Kayayî ra ame dayîş.
Mehmet Kaya yo ke nameyê dezgeyanê sîvîlan yê Dîyarbekirî ser o beyanat wend nê çîyî vatî:
"Serra vîyarte ra hetanî ewro problemêkê ma yê stadyumî yo ke nêqedîyeno esto. Seba halkerdişê nê problemî çi kes û dezgeh nêmendo ke ma pê qisey nêkerdo. Muhatabê ma yo yewin Mudirîyetê Ciwanî û Sporî yê Dîyarbekirî yo, la çi heyf ke ser ra çend aşmî vîyartê ra zî no problem safî nêbîyo.
Ma zî dest pêkerdişê sezonî ra hetanî nika des rey bi îsrar hem bi fek hem zî bi nuştekî waştişê xo ardî ziwan. No problem teyna problemê camîaya Amedî nîyo, la çi heyf ke zafê berpirsîyaran sereyê xo kerd binê qumî û çîyêk nêkerd. Problemê stadyumî teyna problemê Amedî nîyo, no problem ê her kesê ke nê bajarî de ciwîyeno yo. Tîya de berpirsîyarîya tewr pîle ya Mudirîyetê Ciwanî û Sporî yê Dîyarbekirî ya. Ma berpirsîyaran dawetê îstîfa kenê.
Ma hemê dezgehanê Dîyarbekirî, rêxistinanê sivîlan û taraftaranê Amedsporî seba piştîdayîşê vengdayîşê ke ma kene, dawet kenê. Futbol maseyî ser o ney, meydan ser o rind o. 'Sehaya ma çi ca de ya!'."
