Ziwanê ma de yewna kitab vejîyayo û kitabê bi nameyê ”Warway” hetê nuştox, weşanger û rojnameger Enwer Yılmazî ra ameyo nuştiş.
Enwer Yilmaz o ke bi serrano ke xizmetê ziwanê ma keno bi ziwanê ma yewna kitab neşir kerdo. Nê kitabê ey kitabê şîîran o û Yilmaz bi nê kitabê xo dest bi nuştiş û neşirkerdişê şîîran zî kerdo.
Kitabê Enwer Yılmazî ”Warway” 100 rîpel o, tede 58 sîîrî estê û weşanxaneyê NASî ra vejîyayo. Enwer Yilmazî verê cû zî 2 kitabê hîkayeyan (Ti Dejêko Bêwayîr î û Bena Hol) neşir kerdbî.
”Ziwanê mi, mi rê şîîrî dayî nuştiş”
Enwer Yılmaz derheqê kitabê xo yê neweyî de nê çîyan vano: ”Raşta ci ziwanê ma zaf rindek o. Ziwanê ma her çiqas erey amo nuştiş, edebîyatê ma erey dest pêkerdo zî ziwanêko zaf dewlemend, xorîn û estetîk o. Bi ziwanê ma her tewirê edebîyatî beno û ziwanê ma tu ziwanêkî ra cêr nîyo. Mi çend serrî verî dest ci kerd ke ez çend şîîran binusî. Mi çend hebî ceribnayê labelê badê hînî ez nêeşkaya xo tepişî û ziwanê mi mi rê şîîrê bînî dayî nuştiş. Mi ferq kerd ke merdim eşkeno heme hîsanê xo bi ziwanê xo zî binuso. Ziwanê ma semedê her tewir edebîyatî bes o ke ma pê binusê.
Ma şarêko dejaye, birîndar ê. Ayra ma zaf dekerde yê. Edebîyat, îmkan dano ke ma dejanê xo, birînanê xo û neheqîya ke ma rê ameya kerdiş binusê, bimojnê. Xora eke ma dej, vîr û vînayîş û birînanê xo neqlê edebîyatî bikê ne murekeb, ne qelemî ne kaxizî ma rê bese kenê. Ma hendê miletêko dekerde, dejaye û birîndar ê. Tabî kitabê mi ra verî zî kitabê şîîran ameyê nuştiş û şîîrî ameyê neşirkerdiş. Ê xebatê verînî pêro ercaye yê û xora îlhamê mi zî ê kitab û şîîrê ke hetanî nika ameyê nuştiş o. Her çiqas welatê ma de ziwanê ma roje bi roje kêmî yeno qiseykerdiş zî hetê edebîyatî û medya dîjîtale ra xebatê neweyî estê, benê. Eke rojêk ma heqê xo yê ziwanî bi dest bifîne nê xebatî ke benê do feydê xo zaf bê û her yew sey arşîvêk bê. Ayra her xebata ke bi kurdkî bena ercaye ya.”
Enwer Yilmaz kam o?
Enwer Yilmaz serra 1980î de Dîyarbekir ameyo dinya. Bi eslê xo Çolîg ra yo. 15 serrî yo ke
xizmetê kirdkî (zazakî) keno. Serra 2010î de bi ziwanê xo dest bi karê rojnamegerî kerdo.
Xeylê rojname, keyepel û kovaran de nuşteyê ey vejîyê. Qasê 7 serrî bi zazakî karê televîzyongerî kerdo. Dezgeyanê sey Gün Tv, Azadîya Welat, Jîyan Tv, Beledîyeya Dîyarbekirî,
Çarpel Tv, Podcast Kurdî, Amîda Haber û Zazakî News de karê rojnamegerî kerdo. Heta nika 2 hebî kitabê ey ê hîkayeyan (Ti Dejêko Bêwayîr î û Bena Hol) vejîyayê. No, kitabê ey o hîrêyîn o.
Xelatê ke bi xebatanê xo girewtî:
-2012- Musebaqaya Huseyîn çelebî ya hîkayeyan (Xelata yewine)
-2013- Musebaqaya Çapemenî ya Musa Anterî (Xelata yewine)
-2014- Musebaqaya Çapemenî ya Musa Anterî (Xelata teşwîqî)
-2014- Eğitim Sen (Xelata Manîsyonî)
-2022-Hezkurd (Xelata Podcastan)
-2023- Amîda Haber (Xelata xeberan)
Kitab ey ê verênî
-Ti Dejêko Bêwayîr î (2014) Hikaye
-Bena Hol (2018) Hîkaye
Bi nameyê ”Uca ra” şîîrêka Enwer Yılmazî
Uca ra
Beno ke ez şêrî tîya ra
Wextêkê payîzî de
Tizana tîya êdî welatê ma nîyo
Ti zana tîya êdî welatê merdeyan o
Ti zana ez çiqas dejaya, birîndar kewta tîya de
Zerrîya mi erzîya verê cinawiran...
Ti zana ke tîya hînî vengî ya
Welbîyayîş, çînebîyayîş o tîya
Ti zana tîya de ma rê ca çîne yo
Tîya peynîya rayîrê ma wo.
Beno ke ez şêrî dûran
Ez uca de xo bikî embazê koyan
Merimanê çimsîyayeyan
Vilan, dereyan, daristanan
Teyr û tûran
Însananê bêkesan
Uca ra hes bikerî
Fehm bikerî
Bêrîya çimanê to bikerî
Uca ra...