Çarçewaya cipêrsayîşî ya ke Serdozgerîya Komare ya Amedî serra 2022î de dabî destpêkerdiş de, 24ê êlule de Komeleya Cigêrayîşê Ziwan û Kulturê Mezopotamyayî (MED-DER), Payîz Pirtûk û Kooperatîfê Perwerdeyê Ziwan û Hunerî yê Ankarayî ser eştişî virazîya. Sereştişan de zaf kitabî, kovarî û rojnameyê ke destûrê înan çin bî, ameyî destserkerdiş.
Dadgeha Cezaya Sulhî ya Amedî ya 3. û 4., derheqê nê weşanan de qerarê komkerdişî da. Qeraran de ame îdîakerdiş ke nê weşanan "propagandaya rêxistinî kerda" û "bi hawayêko ke rêxistinî teşwîq keno" nuştê. Qerarê komkerdişî, xalê 7/2 yê Qanûnê Têkoşînê Verba Terorî û xalê 25/2 yê Qanûnê Çapemenîye de ame girewtiş.
Kitabanê ke ameyî komkerdiş ra tayê nê yê: "Jina Di Dilê Çiyê de Bilind Dibe", "Gelîyê Tîyarê", "Bingeh û Sedemê Persgirekê Kurdî", "Şoreşgerê Kurd Nîyazî Usta", "Kavirê Anarşîstî", "Agir bi Berfê Ket", "Têbinîyê Bakurî", "Rêya ke Agêrayîş Tede Çin o".
Kovaranê ke ameyî komkerdiş ra tayê nê yê: "Modernîteya Demokratîk" (hûmara 1, 2, 39, 48), "Ekolojîk Yaşam" (hûmara 2, 3, 4 û 5), "Jîneolojî" (hûmara 16, 29 û 31).
Rojnameyê ke ameyî komkerdiş "Yenî Yaşam"î ra hûmarê 28ê hezîrane, 15 û 17ê temmuze, 23ê êlule û "Xwebûn"î ra hûmara 16-22yê êlule yê.
