ZAZAKÎ NEWS- Çarçewaya tehqîqatê "Ahmet Ozerî" de, derhênerê kurd Kerem Tekoglu ke bi nameyê "Keremo" yeno şinasnayîş zî tede, 11 kesî bi îdîaya "endamîya rêxistina terorî ya çekdare" ameyî tewqîfkerdiş.
Verê cû, çarçewaya tehqîqatê ke hetê Serdozgerîya Komare ya Îstanbulî ra yeno ramitişî de 12 kesî bi îdîaya "eleqeyê înan Ahmet Ozerî reyde esta" hetê polîsan ra amebî tepiştiş. Mîyanê nê kesanê ke amebî tepiştiş de derhêner Kerem Tekoglu zî estbi. Keremo tewr peynî nuştox û cigêrayoxo namdar o Zaza-Kird M.Malmîsanijî ser o bi nameye “Mamostayo Bêmamosta” yew belgefîlm antbi.
Avukatê ey Suphî Ozgenî hesabê xo yê medya sosyalî ra dîyar kerd ke Tekoglu erzîyayo hepisxane.
"Qerarêko huqûqî nîyo"
Ozgenî wina va:
"Roja îne ya vîyarte, 12 kesî ke mîyan de muwekilê mi nuştox û derhêner Kerem Tekoglu zî esto, bi îdîaya ke bi şaredarê Esenyurtî yê tepişteyan Ahmet Ozerî dir telefonî de qisey kerdê, amebî tepiştiş.
Emşo 12 kesê ke berdî Dadgeha Îstanbulî, pêro hetê dozgerî ra seba tepiştişî ameyî şawîtiş. 12 kesanê ke cipersayîşê înan 5. û 8. Dadgehê Cezaya Sulhî de dewam kerd ra teyna yew kes seba emrê xo kontrol adlî ya ke ma vanê hesê keyeyî û 11ê bînî ke muwekilê mi zî tede yo, bi îdîaya 'endamîya rêxistina terorî ya çekdare' ameyî tewqîfkerdiş. Ez seba muwekilê xo bi rehetîye vana ke no qerar se ra 100 huqûqî nîyo."
