Şaristanê Sêrtî de yew nêweşa ke tirkî nêzana rê testê eşnawitişî nêameyo kerdiş.
Doktorî kaxid ser o nuşto ke, nêweşe tirkî nêzana. Coka ci rê testê eşnawitişî nêameyo kerdiş.
Goreyê xebera MA'yî Fatma Sûmelî 17ê Êlule de seba problemê goşê xo şîya nêweşxane. Labelê Sûmelî tirkî nêzanêne, testê "Eşnawitişî (SRT)" ci rê nêame kerdiş. Doktoro ke aye muayene kerdo, belgeyê ke seba testî amade bîyo de wina nuşto: "Çunke nêweşe tirkî nêzana, coka qîymetê SRT nênê peymitiş." Doktorî pêşniyaz kerdo ke wa Sûmelî bierşawê yew nêweşxaneyê bînî.
Derheqê meseleyî de Parlamentera Partîya DEMî ya Erzirumî yew beyanat da. Beştaşe vata, "Ê ke derman nêkenê, çi pêşniyaz kenê? Ferzkerdişê yew ziwanî weşîye û cuya merdiman rê zulum o; Û doktor sondê Hîpokratî keno yew het. No ne aqil de, ne mantiq de û ne zî wicdan de ca gêno! Ê ke tirkî nêzanê wa bimirê; Na nijadperestîye ya! Ma vanê wa ziwan her warê cuyayîşî de ca bigîro û bêro bikarardiş. La nêweşêk nêno dermankerdiş, no çi yo?! Îzahê ney çin o. Ganî hema-hema seba perwerdeyê bi ziwanê dayîke û her ware de karardişê ziwanî, xebatî bêrê destpêkerdîş."