Şaredarîya Amedî ya Şaristanê Girdî "Atolyeya Pawitişê Nêzdî" ya ke vera şîdetê cinîyan dest pêkerda, eleqeyêko pîl vînena.
Serekîya Daîreya Xizmetê Cinî û Keyeyî, bi munasebetê 25ê Teşrîna Peyêne Roja Têkoşînê Mîyanneteweyî ya vera Şîdetê Cinîyan, çarçeweya kampanya ya "Vatişê ma nêqedîya, ma do pîya şîdetî vindarnê" de aktîvîte û xebatan dewam kena.
"Atolyeya Pawitişê Nêzdî" ke Merkezê Cuya Cinîyan ê Parka Koşuyolî yê qezaya Baglarî de organîze bena, na çarçewa de xebatanê ke dest pêkerdê, na xebate înan ra yew a. Verê cinîyê ke Şaredarîya Şaristanê Girdî de xebitîyenê, înan ra dest pêkerd, nika cinîyanê Amedî ra eleqeyêko pîl vînena.
Atolyeya ke di aşmî ramena, tede teknîkê ke cinî ganî senî xo vera êrîşan bipawê, yenê musnayene. Bi no hewa hedef o ke cinî rojanê xo yê asayîyan de vera êrîşanê muhtemelan xo bipawê.
Rastê şîdetî ameya, bîye perwerdekara pawitişê nêzdî
Antrenora Atolyeya Pawitişê Nêzdî Evin Turan ke derheqê xebatan de melumat da, îfade kerd ke a zî seba ke rastê şîdetî ameya, na qade ser o xebitîyaya. Turan qeyd kerd ke 7 serrî yo cinîyan rê perwerdeyê pawitişî dana û wina qisey kerd: "Verê mi dersa pîlatesî dayêne. Seba yew hedîseyê ke ame sereyê mi, eleqeyê mi yê pawitişê nêzdî bîye zêde. Yew roje, şewe saete 8-9î de ez şîyêne keye, di lajekî bi fekkî êrîşê mi kerd. Dima wexto ke mi telefon de qisey kerdêne, peyê mi ra telefonê mi girewt û remayî, naye kerdene de kardî vete û ez tehdît kerda. Coka mi perwerdeyê pawitişê nêzdî girewt û seba ke wexto ke cinî rastê yew hedîseyê şîdetî bêrê bieşkê xo bipawê, mi dest bi na qade kerd. Mi perwerde girewtî û ez bîya antrenor. Mi dest bi dayişê dersê pawitişê nêzdî yê domanan û cinîyan kerd."
Turan dîyar kerd ke cinî komelî mîyan de tim rastê şîdetî yenê û qisey kerd ke badê ke cinî ameyê dersan, xeylê cayan de şênê xo bipawê.
Turan qiseyanê xo ser o îlawe kerd ke qezaya Baglarî de xeylê cinîyê ke bêçare yê est ê û va ke Merkezê Cinîyan ê Parka Koşuyolî yê Şaredarîya Şaristanê Girdî de xeylê kursî bêpereyî yenê dayene.
Roje de 40 cinî perwerdeyê Pawitişê Nêzdî gênê
Turan va ke ê saete 09:00 de dest bi dersan kenê û îfade kerd ke ê roje de 35-40 cinîyan rê perwerde danê.
'Tîya zaf çî dano ma'
Kursiyer Sema Ayhan zî sebebê ameyîşê xo yê Atolyeyî nê qiseyan de îzeh kerd: "Teber ra ma tim rastê şîdetî yenê. Coka ez vînena ke ganî her cinî xo bipawa. Ez vînena ke ganî her cinî bêra nê tewir kursan. Ma yenê tîya ke ma bieşkê xo hîna weş bipawê. Tîya zaf çî dano ma. Verê ke ma bêrê Atolye ma nêzanayêne ke ma do bieşkê xo bipawê. Eke yewî êrîş bikerdêne ma, ma nêeşkayêne cewab bidê. La badê ke ma ameyî tîya ma musayî ke ma senî xo bipawê. Ez vînena ke ma nika eşkenê vera êrîşan vindê."
Çimeyê xebere: Bultenê Şredarîya Amedî
