Bakurê Kurdistanî de bajarê Wanî de, serê sibayî ra mij û qeşa ra rayirê Wan û Erdîşî ser o 30 erebeyî têver şîyê û peynî de 2 kesî merdî û 15 kesî darbîyayî.
Serê sibayî rayirê Wan-Erdîşî ser o, 15 kîlometreyî nêzdiyê Tuşbayî de rîyê mij û qeşa ra qeza bîye.
Wexto ke ekîbî mudaxeleyê qezaya yewin kerdêne, nêzdiyê a herême de qezaya diyine bîye û na qeza de zî zaf wesayîtî têver şîyê.
Nêzdiyê 30 wesayîtî pêroyê her di qezayan de bîyê û goreyê tesbîtanê verênan 2 kesî merdî, 15 kesî darbîyayî û rayir padîya.
Agahdarkerdişî ra dima ekîbê weşiye, cendirme, polîs, AFAD û ekîbê pawitişê sivîlan şîyê cayê bîyene.
Ekîbê weşiye darbîyayeyî berdî nexweşxaneyanê dormeyan.
Walîyê Wanî Ozan Balcî zî derheqê qeza de beyanat da û va:
"Ma ekîbê ma pêro şirawîyayî cayê qeza.
Nika zî xebatê ekîbanê ma semedê berdişê darbîyayeyan û wedardayîşê wesayîtanê qezakerdayan dewam kenê.
Rayir padîya. Wesayîtî ke ameyî wedarnayîş ra dima do rayir akerde bo. Homay şefeqetê xo welatijanê ma yê ke canê xo vînî kerdo ra biko."
