Dewaya kişyayîşê Narîn Gurane ke vizêr Mehkemeya Cezaya Girane ya Dîyarbekirî de dest pêkerdbî ewro zî dewam kerd.
Roja ewilî ya dewa kişyayîşê Narîn Gurane vizêr nêzdîyê 14 saetan ramit.
Narîn Gurana 8 serre dewa Çûlîye ya qezaya Rezanî ya Dîyarbekirî de bi hawayêko wehşî ameybî kiştiş.
Roja dîyine ya dewa saete 09:00 de reyna dest pêkerd û sucdarî do bêrê goşdarîkerdiş.
Vizêr çar sucdarî û di şahidî ameyî goşdarîkerdiş û sucdarî idîayî deheqê înan de kerdî.
Goreyê îdîanameyê Serdozgerîya Komare ya Dîyarbekirî, sucdarê tepişyayeyî apê Narîne Salîm, maya aye Yuksel, birayê aye Enes û cîranê înan Nevzat Bahtiyar bi "pîya kiştena gedeyan" yenê sucdarkerdiş û seba înan cezaya heta-hetayî yena waştene.
Derheqê 22 kesan de qerarê "bi zor ardişî" ameyo dayîş.
Mehkemeya Cezaya Girane ya Dîyarbekirî, teberê 4 kesanê tepişyayan ra qerar dayo ke 22 kesê bînî ke verê cû dosya de îfade dayê, bi zor seba roniştişî bêrê ardiş.
Nê 22 kesan mîyan de pîyê Narîne Arif Guran zî sey "şikayetkar û kesê ke bîyayîş ra zerar dîyo (muştekî)" do salona mehkeme de amade bo.
50 baroyê Tirkîya û Bakurê Kurdistanî bi serperiştîya Yewîya Baroyê Tirkîya salona mehkeme de amade yê û dewa taqîb kenê.
Zaf parlamenterê DEM Partî û temsilkarê sazîyanê sivîlan zî beşdarê dewa benê.
Bi nameyê CHP zî Hetkara Serekî Asu Kaya û Parlamenterê Dîyarbekirî yê CHP Sezgîn Tanrikulu dewa taqîb kenê.