Komîsyonê Heqê Domanan ya Baroya Rihayî şewa vîyarteye hesabê xo yê medyaya komelkî ser o îlan kerd ke Riha de yew domana 5 serrî badê tecawizî cuya xo vîndî kerda.
Komîsyonî da zanayîş ke, hedîseyî nêzdî teqîp kenê ke, kes yan zî kesê ke no sûc kerdo, bêrê cezakerdiş.
Komîsyonê Heqê Domanan ya Baroya Rihayî beyanatê xo de ard ziwan:
"Ma sey Komîsyonê Heqê Domanan ya Baroya Rihayî bi xemgînî musayî ke yew domana 5 serrî 15ê aşmî de seba şikê tecawizî cuya xo vîndî kerda.
Seba ke faîlî cezayanê ke lazim ê bigêrê ma sey Komîsyonê Heqê Domanan ya Baroya Rihayî raya pêroyî rê danê zanayene ke ma do hedîseyî dima şêrê."
Goreyê amaranê yew raporê Baroya Rihayî, 1ê Çeleyê Peyênî yê 2023î ra hetanî 31ê Tişrîna Verêne ya eynî serre hetê înan ra 545 avukatî seba dîmadîmşîyayîşê dozanê domananê mexdûrê tecawiz û îstîsmarê cinsî ameyê wezîfedarkerdene.
Ancîya seba kênanê ke mabênê 12-15 serran de yê 142 û seba lajanê ke eynî emrî de yê zî 26 avukatî ameyê wezîfedarkerdene.
Seba kêna û lajanê ke mabênê 15-18 serran de yê zî pêroyî 204 pavukatî hetê baroyî ra ameyê wezîfedarkerdene ke dozanê derheqê tecawiz û îstîsmarê vera înan de dima şêrê.
