Heyetê Îmralî yê DEM Partî seba pêvînayîşê Abdullah Ocalanî muracatê Wezaretê Edaletî kerd.
Heyetê Îmralî seba ke reya dîyine Rayberê PKKyî Abdullah Ocalanî reyde pêvînayîş biko, muracatê Wezaretê Edaletî kerd. Nêameyo zanayene ke kam do heyetî de ca bigêro.
Parlamenterê DEM Partî Sirri Sureyya Onder û Pervîn Buldan 28ê Kanûnî de Hepisxaneyê Îmralîyî de Rayberê PKKyî Abdullah Ocalanî reyde yew pêvînayîş kerdbî. Heyeto ke Sirri Sureyya Onder, Pervîn Buldan û sîyasetmedar Ahmet Turkî ra ameyêne pê, Îmralî ra pey partîyanê sîyasîyan ke grûba înan Meclîs de esta, sîyasetmedaranê ke girewteyî yê, endamanê DEM Partî û dorûverê cîyayan reyde pêvînayîş kerd.
Çi bîbî?
Rayberê PKKyî Abdullah Ocalan 23ê Tişrîna Verêne ya 2024î de çarçewaya pêvînayîşê keyeyî de 43 aşman ra dima reya verêne birazayê xo Omer Ocalanî, Parlamenterê DEM Partî yê Rihayî reyde pêvînayîş kerd. Ocalanî pêvînayîş de destnîşan kerdbî ke ey ser o tecrîd dewam keno û wina vatbî, "Eke şert û mercî bibê, hêza mi ya teorîk û pratîk esta ke ez no pros meydanê pêrodayîş û şîdetî ra vejî meydanê huqûqî û sîyasî ser."
Badê pêvînayîşî Buroya Huqûqî ya Seserre îlan kerd ke 6ê Tişrîna Peyêne ya 2024î de 6 aşmî cezayê newe yê qedexekerdişê pêvînayîşî Ocalanî rê ameyo dayene.
Serekê Pêroyî yê MHPyî Devlet Bahçelî kombîyayîşê grûba partîya xo yê 26ê Tişrîna Peyêne de va, "Ma paweyê cî yê ke mabênê Îmralî û grûba DEMî de rî bi rî pêvînayîşî bêrê kerdene."
Hemserekê Pêroyî yê DEM Partî Tuncer Bakirhanî cewabê bangê Bahçelî da û va, "Ma sey hemserekî wazenê şêrê Rêzdar Ocalanî reyde pêvînayîş bikê û hetkarîya aştîya nê welatî bikê."
DEM Partî seba ke Ocalanî reyde pêvînayîş biko eynî roje muracatê Wezaretê Edaletî kerd.
Wezaretê Edaletî aşmêk ra dima cewabêko pozîtîf da muracatê DEM Partî û Pervîn Buldan û Sirri Sureyya Onderî 28ê Kanûnî de Girava Îmralî de Ocalanî reyde pêvînayîş viraşt.
Dima Ahmet Turk zî şande de ca girewtbî. Waştişê Ocalanî ser o Onder, Buldan û Ahmet Turkî partîyanê sîyasîyan reyde dest bi pêvînayîşan kerd.
Xebere: Enwer Yılmaz
