Dîyarbekir de kişta Ceylan AVMyî de yew erazîya venge de, semedo ke çopî erzîyay pêser şarê dorûverî hêrsê xo nîşan da û beledîye ra waşt wa kare xo biko.
Qezaya Kayapinarî ya Dîyarbekirî de, kişta AVMya Ceylane de hetê kesanê ke nasnameyê înan nêzanîyeno yew erazî sey cayê rijnayîşê eşteyan yeno şuxulnayîş.
Lastîkê erebeyan yê ke erzîyay erazî zî hem zerar danê dormale hem zî benê sebebê gemarîya hewayÎ.
Heto bîn ra cayo ke çopî erzîyenê ci, reyna bîyo merkezê kesanê ke tîryak ancenê.
Ca, rayîrê mabênê Dîyarbekir-Riha ra di metreyî dûrî yo û roje de seyan merdimî tira vîyarenê.
Şar vano ke, hem gemarîya dormaleyî hem zî problemê emnîyetî zêde yo tîya de, ma rayedaran ra wazenê ke acîlen tedbîr bigêrê. Na rewşa ke merkezê bajarî de virazîyena, kêmasîya tedbîran nîşan dana.
Çimeyê xebere: Amida Haber
