ERXENÎ - Şûbeya Erxenî ya Egîtîm-Senî do serra 2025î de seba vîrardişê Narîn Gurane yew musabeqaya hîkayeyan organîze biko. Musabeqa bi şîarê "Her kes wayîrê hîkayeyêk o" ame organîzekerdiş û amancê ey averberdiş û nuştişê ziwanî yo.
Goreyê malumatê ke Egîtîm-Senî dayo, musabeqa de hirê ziwanî (zazakî, kurmanckî û tirkî) ca gênê û hîkayeyî do hetê xebitnayîşê ziwan, munîtişê edebî û ercanê merdimîye ra bêrê nirxnayîş.
Şertanê musabeqe de ameyo vatiş ke babeta tedeyî ra çi sînor çin o û nuşteyî eşkenê hem seba pîlan hem zî seba domanan bibê. Her kes eşkeno musabeqe rê beşdar bibo û hîkayeyê xo hetanî 5ê Nîsana 2025î bierşawo.
Musabeqa de pêro pîya 28,500 TL xelat esto û seba her beşe de do cîya bêro dayîş. Her beş de xelatê yewinî 5000 TL, xelatê dîyinî 3000 TL û xelatê hîrêyinî 1500 TL yo.
Netîceyê musabeqe do 23ê Nîsana 2025î de Erxenî de bi merasîmêk bêro eşkerakerdiş û merasîmê xelatdayîşî zî do 26ê Nîsana 2025î de bêro viraştiş.
EGÎTÎM-SEN
ŞÛBEYA ERXENÎ
MUSABEQAYA HÎKAYEYAN SEBA XOVÎRARDIŞÊ
NARÎN GURANE
MUSABEQEYA HÎKAYEYAN A VERÊNE SEBA XOVÎRARDIŞÊ NARÎN GURANE
Seba amancê raverberdişê wendiş û nuştişî, serra 2025î de seba xovîradişê Narîn Gurane bi şîarê ‘Her kes wayîrê hîkayeyêk o’ musabeqeya hîkayeyan do bêro degirewtene.
ŞERTÊ TEWRÊ CI BÎYAYÎŞÎ
- Ziwanê musabeqe kirmanckî (zazakî), kirdaskî (kurmancî) û tirkî ya.
- Hîkayeyî do hetê xebitnayîşê ziwan, munitişê edebî û ercanê merdimîye ra bêrê erjnayene.
- Hetê babeta tedeyî (tema) ra sînorêk çin o.
- Tedeyîya hîkayeyan eşkena xitabê pîlan yan zî domanan bikero. Na babete de zî çi sînor çin o.
- Hîkayeyî ganî bi ziwanêdo zelal û eke mumkin bo bi komputere bêrê nuştene.
- Berê (eserê) ke 05.04.2025î ra dima biresê destê ma do nêrê qebulkerdene.
- Berê (eserê) ke bêrê erşawitene, do reyna bi nuştoxan nêrê dayene. Şûbeya Erxenî ya Egîtîm-Senî do bibo wayîrê heme telîfanê hîkayeyan.
- Hem berê (eserê) ke xelate bigîrê û hem zî eserê bînî, goreyê îmkanan do bêrê çapkerden û bê pere şarî ra vilakerdene.
- Beran (eseran) de hetê hûmara rîpelan ra sînorêk çin o, labelê ganî formatê hîkaye bêro pawitene.
- Kesê ke tewrê musabeqe bibê, eşkenê her ziwan yan zî lehçe de tenya bi berêk (eserêk) tewrê ci bibê.
- Berê (eserê) ke bêrê erşawitene, ganî eserê winasî bê ke verî cayêk de nêameyê weşanayen yan zî çapkerdene.
- Seba ke bêrê erjnayene ganî her beş de tewr tayn des (10) hîkayeyî biresê ma. No şert seba lehçeya kirmanckî (zazakî) do çin bo.
- Netîceyê musabeqe do 23.04.2025 de Erxenî de bi merasîmêk raya pêroyî rê bêrê eşkerakerdene.
- Merasîmê xelatdayîşî do 26.04.2025 de Erxenî de bêro degirewtene.
· Tarîxê beşdarbîyayîşî yo peyên: 05.04.2025
· Xelatê musabeqe sey pere pêro pîya 28500 TL yê.
· Babeta hîkayeyan hetê tedeyî ra serbest a.
· Mumkin o ke eserî bi destan, email yan zî kargo bêrê erşawitene.
· Her kes eşkeno beşdar bo.
XELATÎ
Yewinî/Yewine rê 5000 TL
Dîyinî/Dîyine rê 3000 TL
Hîrêyinî/Hîrêyine rê 1500 TL
Çarinî/Çarine rê do xelata mansîyonî bêro dayene.
Xelatî seba her beşî do cîya bêrê dayene.
Fatma Yılmaz
