Dîplomatê G7 ewro veng dayî Rûsya ke pêşnîyazê Amerîka yo adirbestî qebûl bikero.
Ê dîplomatan Kanada de beyanatêko muştereke de îfade kerd ke înan kombîyayîşê xo vato ke eger Rûsya asirbestî qebûl nêkero, ê do vera Moskowayî hîna zêde cezayan bidê û hîna zêde ardim bidê Ukrayna.
Qesra Sipî îzah kerd ke Temsîlkarê Serekê Amerîka Donald Trumpî, Steve Witcoff roja Pancşeme Serekê Rûsya Vladimir Putinî reyde kom bîyo.
Wezîra Teberî ya Kanada Melanie Joly va ke heme wezîrê teberî yê G7 pêşnîyazê Amerîka yo seba adirbestî ser eynî fikir de yê û îzah kerd ke nika ê cewabê Rûsya pawenê.
Dima ra Wezîrê Teberî yê Brîtanya David Lammy zî eynî qayde fikrê xo va. Lammyî îfade kerd ke ê adirbestî ser eynî fikir de yê Ey va ke helwesta Rûsya ya adirbestî ser eşkera yo û nika dore cewabdayîşê Rûsya de yo. Beyanatê muşterek yê G7 ra dima Kremlîn vat ke, seba adirbestê Ukrayna ganî hîna zaf çî bêrê kerdene û ma nika nêwazenê pêşnîyazê Amerîka qebûl bikerê.
Vvervatoxê Kremlînî Dmitry Peskov îzah kerd ke Putinî tayê persî adirbestî ser ardî rojeve û va ke ê paweyê cewaban ê. Serekê Ukrayna Volodymyr Zelenskyy zî îfade kerd ke, Putin bi zanayîş proses keno zehmet û vernîya averşîyayîşî gêno.
Zelenskyy roja Çarşeme vatbî ke adirbestê demkî yê 30 rojî yo bêşert gamêko muhîm o seba aştîyêka mende.