ZAZAKÎ NEWS - Parlementoyê Ewropa (PE) de vizêr (1ê Nîsane) bi sernameyê "Zextê ke Tirkîya de demokrasî ser o yê û tepişîyayîşê Ekrem Îmamoglu" kombîyayîşêk ame kerdiş.
Kombîyayîş de Mesula Komîsyonê Ewropa Marta Kos qisey kerd û îfade kerd ke seba protestokerdişê tepişîyayîş û kar ra girewtişê Îmamoglu, nêşina Forumê Dîplomasî yê Antalya.
Kos îlan kerd ke aye pêvînayîşê xo yê bi Wezîrê Karê Teberî Hakan Fîdan reyde betal kerdo.
"Ganî YE vera kerdenanê Tirkîya bêveng nêmano"
Goreyê xeberê DW, Kos da zanayîş ke ê pawenê ke Tirkîya ke verendamê endamîya Yewitîya Ewropa (YE) ya, goreyê qayde û tetbîqkerdişanê demokratîkan hereket bikero.
Kos balê xo ant çalakîyanê ke ameyê kerdene ser û Tirkîya ra waşt ke kesê ke protestoyan kene rê mudaxele nêkero.
Kombîyayîş de nameyê Grûba Xirîstîyanê Demokratan ser Serekê Şaxa PEyî yê Komîsyonê Parlementoyî yê Têkel a Tirkîya-YEyî Emmanouil Kefalogiannis qisey kerd û dîyar kerd ke ganî YE vera bîyayîşanê Tirkîya bêveng nêmano. Heto bîn ra da zanayîş ke înan kombîyayîşê KPKyî ke do 14-15ê Nîsana emserî de biamêne organîzekerdiş, betal kerdo.
Sanchez: Tirkîya welatêko rayîr ra veîyaya ya
Raporkerê Tirkîya yê PEyî Nacho Sanchez Amor zî qiseykerdişê xo de Tirkîya sey welatêkê "rayîr ra vejîyaya" nîşan kerd. Sanchez ard vîr ke krîterê ke ganî welatê verendamê endamîya Yekîtîya Ewropa bica bîyarê estê û semedê betalkerdişê beşdarbîyayîşê Forumê Dîplomasîye yê Antalya sipasîya Komîsyonê Ewropa kerd.
Nameyê Grûba Lîberal (Renew) ra Parlementero Hollandij Malik Azmanî qisey kerd û bêvengîya Yewitîya Ewropa ya vera bîyayîşanê ke Tirkîya de benî rexne kerd. Nameyê Keskan ra endamo Sloven Vladîmîr Prebîlîc zî qisey kerd û va, "Ganî Tirkîya rê mesajêka zelale bêra şawitene."
Peynîya kombîyayîşî de çi qerarêk nêameyo girewtene.
