Platforma Pawitişî û Pêameyîşî ya Bajarî ya Amedî, Seba Çareserîya Meselaya Kurd Meclisa Tirkîya de têkilîyan virazena
Platforma Pawitişî û Pêameyîşî ya Bajarî ya Amedî, derheqê munaqeşeyanê ke wextê peyênî de seba çareserîya demokratîke ya Meselaya Kurdan dest pêkerdo de, fikrê xo AK Partî, CHP, DEM, Gelecek, DEVA û Partîya Seadetî ke Meclisa Tirkîya de grûbê înan esto, reyde pare kerd.
Serekê Odaya Tîcaret û Sanayî ya Amedî Mehmet Kaya, Serekê Baroya Amedî Abdulkadir Guleç, Serekê Odaya Muhendîsanê Înşaatî ya TMMOBî Mahsum Çiya Korkmaz, Sereka Komelaya Cinîya Karkeran a Rojhelat û Başûrê Rojhelatî Ozlem Kulahçi Tanaman, Serekê Şaxê KESK ESMî Serdar Keskîn, Serekê Şaxê ÎHDyî Ercan Yilmaz, Sereka Şaxê SESî Yildiz Ok Orak û Sereka Komelaya Cinîyan a Roza Suzen Îşbîlen ke îdareyê Platforma Pawitişî û Pêameyîşî ya Bajarî ya Amedî de ca gênê, di rojî Meclisa Tirkîya de Serekê Partîyanê ke grûbê înan esto reyde kom bîy.
Platforma ke Serekê AK Partî, CHP, DEM, Gelecek, DEVA û Partîya Seadetî ke Meclisa Tirkîya de grûbê înan esto reyde kerd, derheqê çareserîya Meselaya Kurd de nê pêşnîyazî kerdî:
- Ma do prosesê ke derheqê çareserîya Meselaya Kurd de bi rayîrê dîyalogî dest pêkeno de hem desteg bidî hem zî taqîb bikerî,
- Amed û bajaranê mintiqa de seba ke proseso ke do dest pêbikero aştîya domdar bîyaro meydan xeylê waştiş û taleb esto,
- Proseso ke do bêro domnayene ganî xemê sîyasî ra dûrî, goreyê heqanê merdiman ê unîversalî bêro domnayene û seba naye heme kesî ganî bi mesulîyet hereket bikerê,
- Prosesî de astengîyê ke eşkenê vejîyê ganî bêrê qebulkerdene û ganî seba çareserîya meselayî bi hawayêko aştîyane israr û cesaret bêro mojnayene,
- Seba ke proses bibo sosyal zî ganî yew metod ke tede rêxistinê komelaya şarî zî ca bigêrê bêro dîyarkerdene.
Platforma Pawitişî û Pêameyîşî ya Bajarî do rojê ameyoxî de derheqê nê pêvînayîşan de yew konferansê çapemenîye de malumatê hîna zêdeyî bido.