Sere de Amed û şaristananê bînan de çeteyê fuhuş û tiryakî est ê. Sazgehê demokratîkî yê Amedî ameyî têhet û hemverê nê polîkayan platformî “Şîyar be” awan kerd. Platform do 26ê nîsane de bi rayîrşîyayîşêko ke Sumerparkî ra heta Keçîburcu dewam bikero û bêro deklerekerdiş.
Derheqê awankerdiş û xebatan de Verfeka Platformî avûkat Gulşen Demîr ajansê JINNEWS’î rê qisey kerd.
‘Emrê şuxilnayîşê tîryakî vejîya 9’
Gulşen Demîr da zanayîş ke ê sazgehanê demokratîkan dir ameyê têhet û 5 aşmî yo nê ser de şuxilîyenê û wina va: “Kurdîstan de sere de zî Amed de cinîyanê ciwan, tut û ciwanan ser o nê kerdişî est ê. Xeylêk sazgehê ma, şaredarî û STK’yî ware de xebatî kerdî û dî ke emrê şuxilnayîşê tiryakî vejîyayo 9. Na raştî ma kerd mîyanê xofî û ma dejnaye. Ma zanê sîstemî verê xo dayo ciwanan. Ma zî dî ke ganî xetêka têkoşînî bêra awankerdiş.”
Sewîyeya platformî ameye vatiş
Gulşen Demîr sewîyeya awankerdişê platformî de wina va: “No platform hewcedarî ser o ame awankerdiş. Ma name zî sey ‘Şîyar be’ dîyar kerd. Ma serdayîşê xeylê sazgehan kerd. Ma pêşnîyazî û nimûneyî arê da. Sazgehî zî pêşnîyazîyê xo vatî. Ma do bi paştîdayîşê sazgehan keyeyan reyde bikewê têkilî. Ma hewl danê ke xetêka têkoşînî awan bikerê. Ma do 26ê nîsane de platform deklere bikerê. Ma venga pêro kesan danê ke wayîrê platformî vejîyê.”
