Zerrweş Xodî
Fîlmê “Boğa Boğa”yî 21 Nîsane 2023 de dekewt vîzyon. Fîlmî galaya xo festîvalê fîlmanê Stanbulî yê 42yîne de kerd. Derhênerê fîlmî Onur Saylak û nuştoxê senaryoya fîlmî zî Hakan Günday o. Kaykerdoxê fîlmî zî karektero sereke Kıvanç Tatlıtuğ û karektera hetkare zî Funda Eryiğit a. Fîlm de Kıvanç Tatlıtuğ rih dano karekterê Yalınî, Funda Eryiğit zî rih dana karekterê Beyza. Fîlm de karekterê Daimî zî cayêk taybet tepişeno. Karekterê Daimî zî Gürgen Öz kaykeno.
Fîlm qezaya Çanakkaleyî Asos de vîyareno. Fîlm pistinê xo de zehf metefor û referansan wedareno. Înan ra yewe zî qalê feylesofê yunanî Arsitoteles o. Fîlm de behs beno ke zemanêke Asos bêşer la bi peran dekewto destê banker Eubulosî. Ey ra zî kewto destê koleyê ci Hermanidesî. Hermanides embazê Aristotelesî yo û no semed ra Aristoteles qismêk emre xo Asos de vîyareno.
Fîlm zereyê wesayîtêk ra dest pê keno. Şewe ya. Şoforê wesayîte Yalin o. Ma koltuxa peynîya erebeyî de destê cînîyêk vînenî. Herekîyayîşê fîlmî de ma fehm kenî ke o, destê Beyza yo. Beyza peynîye de ronişte ya. Koltuxa verniye ya verê şoforî de zî yew vilike ronîyaya. Na vilike kaktus a û bi kemerê wesayîte girêdayîya; sey raywanêk vindena. No seqans de kes qisey nêkeno la peyra vengê wendişê kitabêk yêno. No kitab kitabe Jack Londonî “Veyşayîşê Gule” yo. Kitab bi hewayê onlineyî serê ekranê teyîbê wesayîte de weşanîyeno. Risteyê kitabî yênî wendişî; Na dinyaya merdî ya. Tewr xirabîye zî boyetengêya dinyaya bî. Eyam huşk û akerde bi. Eyam de qasê serê derzenî kam, mij, buxur çinîbi. La reyna zî asîman sey çarşeba boyetenga ya rengê guleyî bi. Sebebê naye, her çiqas hewrê ke tîjê rojî bitemernê çinîbi zî rojo ke roşnî bido zî çinîbi. Eke ey ra bipersê, nika çi hîs keno, tena do qîmê xo bîyaro ke vaco wext zehf weş vîyareno.
Naye ra dima ekran tefêno û ma karekterê Yalinî hewşê yew banî de vînenî. Yalin tîya de vilika kaktusî roneno. Tîya ra dima fîlm dest pê keno. Gama Yalin vilika xo roneno, yew kutiko veradaye ey rê ewpeno. Yalin ewnîyeno ey ra û bi engişta xo ya nîşanî şşşt keno.
Herekîyayîşê fîlmî de ma vînenî ke Yalin yew finansman o. La şîrketa ci ameya gerrekerdiş û hukmatî dest nayo serê şîrketî û wayîranê şîrketî girewtê binçim. Yalin zî seba ke nê çîyan ra dûr vindero û nameyê xo bikero pak, bi xanima xo Beyza suke ra bar kenî yenî qezaya pîyê xo. Merdimî ke tîya ciwîyenî nasê înan î. La cuya tîyayî seke ê paweyîne nêşina. Merdimê na qezaye zî pereyi dekerdê şîrketê Yalinî û ê zî maxdur bîyî. Pereyê înan şîyî.
Seba naye nê merdimî Yalinî ra huye kenî û dimayê kiştişê ey yî. Fîlm nê serebutan ser ra vîyareno. Ma qewêmîyayîşê serebutan ra karekteran nas kenî û eşkenî analîz bikerî. Fîlm mirdîya xo mabenê seqansan de mesejan dano temaşekerdoxanê xo. Fîlm de zehf meteforî estî. Hetê bînî ra fîlm selam dano çend fîlman. Nê fîlmî Namuslu (Binamus) û Parfume(Boye) yî. Peynîye de fîlm weş beno temam û reseno heqê xo. Fîlm seqansê peyênî de her serebut û babetanê fîlmî pêşeno û keno vereka temaşekerdoxî.