Mihemed Kurdî

Serra 1999î de Rêxistina Perwerde, Zanist û Kulturî ya Neteweyê Yewbîyayeyan (UNESCO) 21ê Sibate sey Roja Ziwanê Dayîke ya Cîhanî qebul kerd. Badê serra 2000î seranserê cîhanî de 21ê Sibate sey Roja Ziwanê Dayîke ya Cîhanî yeno pîrozkerdene.

Nê serranê peyênan de sazî, dezgeh, komele, hunermend, sîyasetmedar, rêxistin û partîyê kurdan zî na roje (21ê Sibate) pîroz kenê û qalê muhîmîya ziwanê dayîke kenê. Tayê kes û hetê kurdî vanê "Ziwanê ma rûmetê ma yo", tayê vanê "Ziwanê ma estbîyayîşê ma yo", tayê vanê "Ziwanê ma nasnameyê ma yo", tayê vanê "Ziwanê ma namûsê ma yo", tayê vanê "Ziwanê ma maya ma ya."

Reyna nê kes û hetê ke Roja Ziwanê Dayîke ya Cîhanî pîroz kenê, vatiş û peyamanê xo de qalê hîrayîye û dewlemendîya ziwanê kurdkî zî kenê û vanê ke seserrî yê ke kurdkî ser o polîtîkayê giranî yê înkar û asîmîlasyonî estê, labelê reyna zî kurdkî sey ziwananê bînan vîndî nêbîyo.

Helbet pîrozkerdişê na roje û pesindayîşê ziwanê kurdkî rast û muhîm ê, labelê çi heyf zafaneyê nê kes û hetan "Roja Ziwanê Dayîke ya Cîhanî" bi ziwanê xo yê dayîke nê, bi ziwanê tirkî pîroz kenê û reyna bi tirkî pesnê ziwanê kurdkî danê. Tayê kes û hetî zî estê ke cuye û her çîyê înan pêro tirkî yo labelê tenya rojanê taybetan de ziwanê kurdkî yeno vîrê înan.

"Hewcedarîya Kurdkî bi Pesindayîşî nê, bi Wayîrvejîyayîşî Esta"

Ziwan tenya wasitayêko fehmkerdiş û resayîşê mabênê merdiman de nîyo, reyna nuqteyo tewr muhîm o ke neteweyan yewbînan ra cîya keno zî ziwan o û bê ziwanî kes nêbeno milet. Raşta ci ma kurdî wayîrê ziwanêkê zaf rindek û erjayeyî yê. Ziwanê ma hende hêja yo ke eke ma kurdî şewe û roje pesnê ziwanê xo yê kurdkî bidî reyna zî bes nêkeno. Labelê ewro pesindayîşî ra vêşêr hewcedarîya qiseykerdişî, nuştişî, wendişî û emelkerdişî bi kurdkî esta.

Çimkî ewro rewşa ziwanê ma yo rindek weş nîya, kurdkî pêlanê asîmîlasyonî ver ra roj bi roj helîyena.

Sewbîna xora eke ma vajê yan mevajê zî ziwanê kurdkî, ziwanêko qedîm û dewlemend û erjaye yo labelê seba ke ewro ma kurdî pê emel nêkenê, nika verê sekerat de yo. Aye ra zî ganî ma heme qadanê cuye bikerê qadê ziwanê kurdkî.

"Kurdkî Eşkena Hetanê Kurdî Bikero Yew"

Heme partî, tevger, rêxistin û partîyê kurdî hertim bêyewîye ver gereyîyenê û vanê hewcedarîya kurdan bi yewbîyayîşî esta labelê yew zî nêvano no yewîye do senî bibo. Roja ma ya ewroyêne de hetê kurdkî yê sîyasî hetê îdeolojî, qaîde, prensîb, ala û partîyan de yewbînan ra zaf dûrî yê. Her çiqas ke mîyanê hetanê kurdan de fikr û ewnîyayîş û îdeolojîyê cîyayî bibê zî labelê ziwan heme hetan keno yew. Yanî ma eşkenê vajê nuqteyo ke nika kurdan keno yew tenya ziwan o. Partîyê ma yê ke bi serran mîyanê xebate de yê, mîrasê bawkalanan ra çîyêk pêser nêkerdê û ziwan zî bêwayîr verdayo.

Ê partîyê ma yê ke şewe û roje şerê yewbînan kenê, ganî baş bizanê ke ziwanê kurdkî îdeolojîyanê înan ra zaf bihêzêr û pîlêr o. Coka ganî derd û dewaya înan a tewr pîle ziwan bo. Xora zafaneyê şerê înan zî "hak kerge ra yo, yan kerge hakî ra ya" ser o yo, yanî şerêko bêhavil o.

Aye ra hetê kurdî eşkenê binê alaya ziwanî de kom bibê û yewîya xo awan bikerê. Yanî alaya ziwanê kurdkî eşkena ma kurdan bikero yew, coka ganî ma kurdî zî alaya ziwanî çi rey destê xo ra veranêdê û hertim û her ca de aye berz bikerê. Eke ziwanê komelîya ma serkewte bo, bêguman do komelîya ma zî serkewte bibo. Xo vîra mekerê ke vera zilmê dagirkerdeyan de şimşêr û mertalê ma yo tewr bihêz ziwanê ma yo kurdkî yo. Eke kurdkî çiqas bihêz bo, kurd zî do hende bihêz bibê.

Merdimê ke ax û welatê xo ra hes kenê çi rey ziwanê xo xo vîra nêkenê. Yê ke ziwanê xo xo vîra bikerê, do esl û tarîx û çand û welatê xo vîndî bikerê, coka bêrê ma nê ziwanê xo yê erjayeyî bipawê û bi tutanê xo bidê musnayîş.